Астанада «Спортты дамыту дирекциясы» РМКК бұрынғы басшысы Самат Ерғалиев сотталды.
Қалалық соттардың баспасөз қызметінің хабарлауынша, ол лауазымдық өкілеттіктерін теріс пайдаланды деп айыпталған.
Тергеу деректері бойынша, «Спортты дамыту дирекциясы» РМКК басшысы бола тұра, Ерғалиев белгілі бір А. есімді адамды сурдлимпиадалық спорт түрлері бойынша аға жаттықтырушы лауазымына заңсыз тағайындаған.
Содан кейін бұрынғы басшы жаттықтырушыны 19-қысқы Сурдлимпиадалық ойындарға қатысу үшін Италияға іссапарға жіберіп, оның жалақысын, іссапар шығындарын және материалдық пайдасын жалпы сомасы 113 млн теңгеден астам мөлшерде заңсыз алуына ықпал еткен.
Нәтижесінде сот Ерғалиевті кінәлі деп танып, оған 3 жыл 6 ай бас бостандығынан айыру жазасын және мемлекеттік қызмет пен квазимемлекеттік сектор субъектілерінде лауазымдарды атқару құқығынан өмір бойына айыруды тағайындады.
Еске сала кетейік, шілдеде Астанада Олимпиадалық спорт түрлері бойынша спортты дамыту дирекциясының басшысы сыбайлас жемқорлық және бюджет қаражатын жымқыру үшін кінәлі деп танылды. Шенеунік 60 млн теңгеден астам қаражатты жымқырып, бағынышты қызметкерден 4 млн теңге көлемінде пара алған.
Маусымда Алматы қалалық спорт басқармасының және оның ведомстволық ұйымының бұрынғы қызметкерлері күдікке ілінгені белгілі болды. Олар ведомствода нақты жұмыс істемейтін адамдарға жалақы есептеу және төлеу жолымен 56 млн теңгеден астам бюджет қаражатын жымқырды деп айыпталуда.
Сәуірде Шымкентте дене шынықтыру және спорт басқармасының №3 жоғары спорт шеберлігі мектебінің шығыс жекпе-жегі бойынша екі жаттықтырушысы 27 млн теңгеден астам қаражатты иемденгені хабарланған болатын. Бюджет қаражаты оқу-жаттығу жиындары мен спортшылардың жарыстарға баруына арналған еді.
Айыпталушылар кінәларын толық мойындап, сотқа дейінгі тергеу сатысында-ақ келтірілген залалды өтеген. Ақшаны қайтаруына байланысты спорт мектебі дирекциясы тарапынан сотталушыларға қатысты шағымдар болмаған. Нәтижесінде сот жаттықтырушыларға шартты жаза тағайындады.