ТикТок үшін ролик Түркістан облысы Ордабасы ауданының 22 жастағы студент қызына 11 млн теңгеге түсуі мүмкін. Қыз Қызыл кітапқа енгізілген Грейг қызғалдақтарын жұлып алып, бейнеге түсіріп алған.
Түркістан облысы полиция департаментінің баспасөз қызметінің мәліметінше, қыз гүлдерді Ұялыжар ауылдық округінде орналасқан егістік алқаптан жұлып алған. Ол Грейг қызғалдақтарының заңмен қорғалатынын білмеген болуы ықтимал.
«Сирек кездесетін және жойылып бара жатқан өсімдік түрлерімен заңсыз айналысу фактісі полиция бөлімінде тіркелді. Барлық мән-жайлар анықталуда», - делінген хабарламада.
БАҚ мәліметтеріне сәйкес, қызға қылмыстық жаза қолданылуы мүмкін. ҚР ҚК 339-бабы «Сирек кездесетін және жойылып бара жатқан, сондай-ақ пайдалануға тыйым салынған өсімдіктер немесе жануарлар түрлерімен заңсыз айналысу» 3 мың АЕК-ке (11 млн теңге) дейінгі мөлшерде айыппұл салуды көздейді.