Түркістан облысының прокуратурасы Жұмыспен қамту орталығы мен Жетісай ауданының Атамекен ауылы әкімдігінде 24 млн теңгеден астам қаражатты жымқыру схемасын анықтады. Ведомствоның баспасөз қызметінің мәліметінше, шенеуніктер жұмыссыздарды, соның ішінде жастар тәжірибесі аясында жалған жұмысқа орналастырған.
«Жұмыссыз мәртебесін алған 30-дан астам адам іс жүзінде ешқандай қоғамдық жұмыстарды орындамаған және бұл туралы білмеген», - деп хабарлайды прокуратураның баспасөз қызметі.
Лауазымды тұлғалар әр ай сайын жалған жұмысшылардың шоттарына жалақы аударғаны айтылады. Одан кейін ақшаны басқа адамдар қолма-қол алып отырған. Сонымен қатар, Орталық пен әкімдік қызметкерлері өз туыстары мен таныстарын қоғамдық жұмыстарға жалған тартқан.
«Материалдар ақпаратты есепке алу кітабында тіркеліп, сотқа дейінгі тергеуді жүзеге асыру үшін аумақтық Сыбайлас жемқорлыққа қарсы қызметке берілді», - делінген хабарламада.
Еске сала кетейік, бұған дейін белгілі болғандай, Алматы облысының Сыбайлас жемқорлыққа қарсы қызметі «Алматы облысы Іле ауданы Білім бөлімі» ММ басшысына қатысты сотқа дейінгі тергеу жүргізуде. Ол 680 млн теңгені жымқырды деп күдіктелуде. Тергеу оның Іле ауданының орта мектептерінде іс жүзінде жұмыс істемейтін жалған қызметкерлерге жалақы есептеген деп санайды.
Сондай-ақ хабарланғандай, Тараздағы «РозАль орталығы» жеке балабақшасының басшылығы мектепке дейінгі ұйымдарды қаржыландыруға бөлінген 13 млн теңгені жымқырды деп күдіктелуде. Қалалық прокуратураның дерегінше, директор балабақшаға іс жүзінде бармаған балалар үшін бюджет қаражатын алған.