Қостанай облысының әкімі Құмар Ақсақалов бұрынғы Қостанай әкімі Ахмедбек Ахметжановтан тәркіленген «Алтын-Саф» мейрамхана кешені енді сауда-саттыққа қойылмайтынын мәлімдеді.
Informburo.kz деректері бойынша, нысанды өткен жылдан бері сатуға сәтсіз әрекет жасалып келген. Өңір басшысы ғимаратты енді сауда-саттыққа шығару жоспарланбайтынын, керісінше мемлекеттік қажеттіліктер үшін пайдаланылатынын атап өтті.
«Биыл сауда-саттық өтті, ешкім сатып алмады. Онда бизнеспен айналысқанын қаладық. Ешкім сатып алмаса, онда біз бірдеңе жасаймыз. Әртүрлі нұсқаларды талқылап жатырмыз: не мәдени нысан, не жастарға арналған креативті орталық. Барлық басқармалармен талқылап жатырмын, осы үй-жайды пайдалану бойынша қызықты ұсыныстар алғым келеді», – деді Ақсақалов.
Еске салайық, 2016 жылғы сәуірде Ахмедбек Ахметжанов парақорлығы үшін 13 жыл бас бостандығынан айыруға сотталған болатын. Сонымен қатар, оның мүлкі тәркіленіп, өмір бойы мемлекеттік лауазымдарды атқаруға тыйым салынды.
Алайда апелляциядан кейін мерзім 7 жыл 6 айға қысқартылды. Сонымен бірге бұрынғы әкім амнистияға ілігіп, жазасы 4 жыл 10 айға дейін азайды. 2019 жылы Ахметжанов шартты түрде мерзімінен бұрын босатылып, жазасының өтелмеген бөлігі айыппұлмен ауыстырылды.
Осы жылдың қазан айында Ахметжановтан тәркіленген «Алтын-Саф» мейрамхана кешенін электронды сауда алаңында екінші рет сатуға тырысты. Жалпы ауданы 1558,4 м2 болатын кешеннің бастапқы бағасы 307,3 млн теңгені құрады. Бұл алдыңғы баға – 805,5 млн теңгеден 61,84% төмен екені атап өтілді.
Айтпақшы, сол кезде бұрынғы әкімнің тәркіленген активтерінің бірі мемлекет меншігіне берілген «Метрополь» мейрамханасы екені белгілі болды. Қазір бұл ғимаратта «Азаматтарға арналған үкімет» филиалы орналасқан. 2017 жылы Ахметжановтың тағы бір меншігі – 87,4 млн теңгеге бағаланған «Монолит» сауда үйі 40,5 млн теңгеге сатылды.