Әлеуметтік желілерде Жетісу облысы Талдықорған қаласындағы балабақшалардың бірінде түсірілген, қоғамдық резонанс тудырған видео тарады. Кадрларда мекеменің асханасында тоқаштар мен басқа да өнімдердің арасында тарақандар жорғалап жүргені көрінеді.
Liter.kz деректеріне сәйкес, Талдықорған қалалық санитариялық-эпидемиологиялық бақылау басқармасы осы факті бойынша жоспардан тыс тексеру басталғанын хабарлады.
«Басқарма мамандары аталған балабақшаны тексеру жүргізу үшін Қазақстан Республикасы Бас прокуратурасының Құқықтық статистика және арнайы есепке алу жөніндегі комитетінің Жетісу облысы бойынша департаментіне жоспардан тыс тексеруді тіркеді», - делінген хабарламада.
Тексеру қорытындысы бойынша жауапты тұлғаларға қолданыстағы заңнамаға сәйкес шаралар қолданылады.
Еске сала кетейік, ақпан айында Ақтөбе облысы Мұғалжар ауданы Қандыағаш қаласындағы «Самал» балабақшасында жәндіктер жұқтырған 19 кг-нан астам сұлы жармасы жойылғаны хабарланған болатын. Сонымен қатар, мекемеге айыппұл салынды.