Қазақстан Үкіметі, ҚР Ұлттық Банкі және Стати тараптары Tristan Oil компаниясының жетекші кредиторларының қолдауымен және келісімімен Қазақстандағы мұнай-газ активтеріне қатысты көпжылдық дауды бейбіт жолмен шешуге бағытталған негіздемелік келісім жасасты.
Әділет министрлігінің хабарлауынша, қол жеткізілген келісім барлық заңды істерді тоқтатуды және барлық юрисдикциялардағы ағымдағы талап арыздарды тоқтатуды көздейді. Келісім шарттары құпия болып қалады.
«Бұл келісім қоғамдық мүдделерді ескере отырып қабылданды және бюджет қаражатын жұмсауды көздемейді. Біз бұл қадам елімізге жаңа инвестициялар тартуға және экономиканың өсуіне оң әсер етеді деп сенеміз», - деді Қазақстанның Әділет министрі Азамат Есқараев.
Еске сала кетейік, 2010 жылы молдован бизнесмендері Анатол және Габриэль Стати Қазақстан билігін олардың мұнай кен орындарын рейдерлік басып алуда айыптап, төрелік сотқа талап арыз берген еді.
Қазақстанның Статимен сот дауларын үйлестірген консалтингтік топ Bolashak Consulting Group және кейінірек ерекше ірі мөлшерде бюджет қаражатын жымқырды деп күдікке ілінген бұрынғы әділет министрі Марат Бекетаев болды.
Құқықтық қорғау стратегиясы қазақстандық салық төлеушілерден бизнесмендер Статиге сот тағайындаған өтемақыны төлеуді кейінге қалдыру үшін жылына ондаған миллион долларлық шоттарды қаржыландыруды талап етті.Кейінірек әділет министрлігі Bolashak Consulting Group-пен ынтымақтастықты тоқтатты. Ведомство ел мүддесін шетелде қорғау үшін отандық мамандар қатарынан сенімді заңгерлер мен сарапшылар тобын құруды көздегені хабарланған еді.
Айта кетейік, бүгінгі күнге дейін Қазақстанның молдован бизнесмендерімен сот дауларына қанша ақша жұмсағаны әлі де нақты белгісіз.