Жамбыл облысының мамандандырылған ауданаралық экономикалық соты өңір әкімі аппаратының «К.» ЖШС-не қатысты компанияны мемлекеттік сатып алудың жосықсыз қатысушысы деп тану және тұрақсыздық айыппұлын өндіріп алу туралы талап арызы бойынша азаматтық істі қарады.
Өңір соттарының баспасөз қызметінің мәліметінше, маусым айында тараптар әкімдік ғимаратының күмбелін жөндеуге 24 млн теңгеден астам сомаға шарт жасасып, жұмысты орындау мерзімі 60 күн болып белгіленген. Алайда мердігер міндеттемелерді тиісінше орындамай, белгіленген мерзімге сыймаған, содан кейін тапсырыс беруші сотқа жүгінген.
Жауапкер талапты мойындамай, кідіріс тапсырыс берушінің күмбездің шыны элементтерін толық бөлшектеуге тыйым салуынан туындағанын мәлімдеді. Оның айтуынша, әкімдік кезең-кезеңімен ауыстыруды талап еткен, бұл жұмыстың орындалуын қиындатқан.
Қыркүйек айында әкімдік елеулі ақауларды тіркеген акт жасады: 23 шыныда реңктеудің болмауы, шынылардың бір бөлігінің ауыстырылмай зақымдануы, мырышталған парақтардың қисаюы, күмбез құрылымында саңылаулардың болуы, люктің орнатылмауы және құрылыс қоқысының жиналмауы.
Талапкердің өкілі шыныларды кезең-кезеңімен ауыстыру талабы күмбез ғимараттың орталық элементі болғандықтан, жұртшылықтың шамадан тыс назарын аудармау ниетімен туындағанын түсіндірді. Нәтижесінде «К.» ЖШС 743 мың теңгеден астам көлемдегі тұрақсыздық айыппұлын ерікті түрде төледі.
Сот талапты ішінара қанағаттандырды: «К.» ЖШС мемлекеттік сатып алудың жосықсыз қатысушысы деп танылды. Тұрақсыздық айыппұлын өндіріп алудан бас тартылды, себебі ол бұған дейін ерікті түрде төленген.
Еске сала кетейік, бұған дейін Алматы құрылыс басқармасы сотқа «Golden City DS» ЖШС мердігер ұйымына қарсы талап арызбен жүгінген еді. Ведомство компанияны мемлекеттік сатып алудың жосықсыз қатысушысы деп тануды және тұрақсыздық айыппұлын өндіріп алуды талап етеді.