Бас прокуратура заңсыз сот актілеріне наразылық білдірілгені туралы хабарлады. 2024 жылы Жоғарғы Сот ведомствоның наразылықтары бойынша 50 актіні қайта қарады, оның 38-і мемлекет пайдасына 12,3 млрд теңге сомасына шешілді.
Бас прокуратура баспасөз қызметінің мәліметінше, "СК" ЖШС мемлекеттік сатып алу туралы шарттар бойынша Талғарда 2 тұрғын үй кешенін салуға міндеттенген, бірақ құрылысты белгіленген мерзімде аяқтамаған. Нәтижесінде компания тұрақсыздық айыбын төлеуге міндеттеліп, шартты ұзартудан бас тартылды.
Басқа жағдайда, бас прокурордың наразылығы бойынша Қорғаныс министрлігінің Әскери институтына "А.Э.С" ЖШС-ден оқытуға жарамсыз тренажерді қабылдау және 1,1 млрд теңге төлеу міндетін жүктеу негізсіз деп танылды.
Өткен жылы прокурорлар сот актілерін өз бетінше шағымдай алмаған азаматтар мен бизнес субъектілерінің мүддесіне 12 наразылықты қанағаттандырғаны белгілі болды.
Мысалы, Қарағанды облыстық перинаталдық орталығында операция кезінде жергілікті тұрғынның ішкі мүшесі зақымданған. Қазір ол әдеттегі өмір салтын жүргізе алмай, жұмысын ауыстыруға мәжбүр. Нәтижесінде медициналық мекемеден зардап шеккен әйелдің пайдасына материалдық залал – 33 814 теңге және моральдық зиянның өтемақысы – 3 млн теңге өндірілді.
Сондай-ақ, Бас прокуратура Алматы құрылыс басқармасының тапсырысы бойынша балабақша салған "К.А.С" ЖШС мүддесіне наразылық білдірді. Нысанды қабылдау және пайдалануға беру тапсырыс берушінің кінәсінен кешіктірілгеніне қарамастан, соңғысы мердігерді мемлекеттік сатып алудың адал емес қатысушысы деп тануға және тұрақсыздық айыбын өндіріп алуға қол жеткізген. Жоғарғы Сот тапсырыс берушінің талап арызын қанағаттандырмай, бас прокурордың наразылығын қанағаттандырды.