(19 ақпан 2026 жыл | Дереккөз: соттардың баспасөз қызметі)
Қарағанды облысында сот лицензиясыз оқу процесін бастаған жеке мектепті тарату туралы шешім шығарды. Іс қаралған кезде мектепте оқушылар оқып, қызметкерлер жұмыс істеген, алайда білім беру қызметіне рұқсат алынбаған.
ЖАҒДАЙ ҚАЛАЙ ДАМЫДЫ
Мектеп 2025 жылғы 13 мамырда негізгі қызмет түрі – «жалпы орта білім беру» болып тіркелген. 2025 жылғы 2 қыркүйекте мекеме оқу процесін бастап, тиісті лицензиясыз жұмысын жалғастырған.
Бұған дейін компания Әкімшілік құқық бұзушылық туралы кодекстің (ҚР ӘҚБтК) 463-бабының 1-бөлігі бойынша лицензиясыз қызметті жүзеге асырғаны үшін әкімшілік жауапкершілікке тартылған. Тағайындалған айыппұл толық төленген.
Әкімшілік жауапкершілікке тартылғаннан кейін мектеп жұмысын жалғастырған.
МЕКТЕПТІҢ ҰСТАНЫМЫ
ЖШС өкілдері талапты мойындамады. Олардың айтуынша, ұйым 280 орындық мамандандырылған мектеп жобасын іске асыру үшін құрылған, ғимарат жеке инвестициялар есебінен салынған.
Қазіргі уақытта мектепте 166 оқушы, оның ішінде көпбалалы және толық емес отбасылардың балалары білім алуда. Штатта – 35 қызметкер.
Сондай-ақ компания өкілдері лицензия алу үшін құжаттар пакеті «90%-дан астам» дайындалғанын, ал 2026 жылғы 3 ақпандағы өтініш қаралуда екенін хабарлады. Қарау мерзімі 30 жұмыс күнін құрайды.
Олардың мәлімдеуінше, ата-аналардан шағымдар түспеген, ал білім сапасы нашарламаған.
НЕЛІКТЕН СОТ ТАРАТУ ТУРАЛЫ ШЕШІМ ҚАБЫЛДАДЫ
Сот бұған дейін уәкілетті орган ЖШС-ге лицензия беруден екі рет бас тартқанын анықтады. Бұл шешімдерге шағым жасалмаған.
Шешімде лицензия ұйымның балаларды оқыту құқығын растайтыны, мемлекеттік білім беру стандарттарының, білікті педагогтардың, оқу әдебиетінің және қауіпсіз инфрақұрылымның сақталуына кепілдік беретіні атап өтілген.
Сонымен қатар, тек лицензияланған мектептер ғана мемлекеттік үлгідегі аттестаттар беруге құқылы.
Лицензияның болмауы оқу сапасына әсер етпейді деген дәлелдерді сот негізсіз деп таныды.
ҚР «Білім туралы» Заңының 40-бабының 2-1-тармағын басшылыққа ала отырып, сот заңды тұлғаны тарату туралы талапты қанағаттандырды.
Сот шешімі әлі заңды күшіне енген жоқ.