«Самрук-Қазына» қоры Президент Қасым-Жомарт Тоқаевқа аймақтағы дауыс беру құқығы бар алғашқы цифрлық тәуелсіз директорлар кеңесі мүшесі болған SKAI (Samruk-Kazyna Artificial Intelligence) нейрожелісін таныстырды. Тұсаукесер Астанада өткен халықаралық Digital Bridge форумы аясында өтті.
Қордың баспасөз қызметінің мәліметінше, SKAI жасанды интеллект негізінде құрылған және корпоративтік басқарудың ашықтығы мен сапасын арттыруға арналған.
Нейрожелі ішкі және сыртқы нормативтік құжаттарды, 2008 жылдан бергі директорлар кеңесінің шешімдерін және басқа да жинақталған материалдарды талдайды. Бұл неғұрлым салмақты және дәлелді шешімдер қабылдауға мүмкіндік береді деп күтілуде.
«Директорлар кеңесіне ЖИ негізіндегі нейрожеліні тағайындау – бұл кванттық секіріс: технологиялар мен адамдар бірлесіп шешім қабылдай бастайды, ал цифрландыру процестер шеңберінен шығып, басшылық философиясының бөлігіне айналады», — деп атап өтті компанияның басқарма төрағасы Нұрлан Жақыпов.
Қауіпсіздік мәселелеріне ерекше көңіл бөлінгені атап өтіледі. SKAI «Қазақтелеком» компаниясының Al Farabium суперкомпьютерінде жабық контурда жұмыс істейді.
Қорда мұндай жүйе деректерді қорғауға және ақпаратты өңдеудің жоғары жылдамдығына кепілдік беретінін нақтылады. Негізге қазақстандық Alem LLM тілдік моделі алынды.
Еске сала кетейік, бұған дейін Мемлекет басшысы жасанды интеллект саласында мамандандырылған ғылыми-зерттеу университетін құруды тапсырған болатын. Оқу орнына ерекше мәртебе беру және жұмысқа әлемнің жетекші жоғары оқу орындарын тарту жоспарлануда.
Айта кетейік, қыркүйек айында Албания әлемдегі министр лауазымын жасанды интеллект технологиялары негізінде әзірленген виртуалды тұлға иеленген алғашқы ел болды. Жаңа министр Диэлла (албан тілінен аударғанда — «күн») есімін алып, мемлекеттік сатып алу саласын бақылайды.