Қазақстан Премьер-министрі Олжас Бектенов «Самұрық-Қазына» ҰӘҚ» АҚ Кеңесінің отырысын өткізді. Кеңес жұмысына алғаш рет дауыс беру құқығы бар тәуелсіз цифрлық қатысушы — SKAI (Samruk-Kazyna Artificial Intelligence) нейрожелісі қатысты.
Үкімет баспасөз қызметінің мәліметінше, Директорлар кеңесі қордың ағымдағы жылдың тоғыз айындағы қызмет нәтижелерін қарады. Инфрақұрылымдық және энергетикалық жобаларды дамыту жөніндегі Президент тапсырмаларын іске асыруға ерекше назар аударылды.
Аяқталған нысандардың қатарында — Жамбыл облысындағы жел энергетикасына арналған компоненттер шығаратын зауыт, Жаңаөзендегі қуаты 50 МВт күн электр станциясы, Қосшы қаласының алғашқы газдандыру іске қосу кешені және ұзындығы 302 км жаңа «Талдықорған–Үшарал» магистральдық газ құбыры бар.
Сонымен қатар, Достық–Мойынты учаскесінде екінші теміржол жолдары бойынша қозғалыс ашылды, бұл желінің өткізу қабілетін арттыруға және экспорттық тасымалдарды жылдамдатуға мүмкіндік береді.
Қордың басқарма төрағасы Нұрлан Жақыпов есепті кезеңдегі қаржылық және өндірістік нәтижелер жоспарлы мәндерге сәйкес келетінін баяндады. Ірі инвестициялық жобалар бойынша қаражатты игеру 99% құрады.
Өз кезегінде Директорлар кеңесінің цифрлық мүшесі SKAI отандық тауар өндірушілерді қолдау туралы аналитикалық есеп ұсынды. Оның деректері бойынша, тоғыз ай ішінде қазақстандық компаниялардан тауарларды сатып алу көлемі 75%-ға өсіп, 721 млрд теңгені құрады. Барлығы 497 жеткізушімен 7 мыңнан астам шарт жасалды.
SKAI бағалауы бойынша, жылдық сатып алу жоспары Wabtec компаниясына тиесілі отандық өндірушіден локомотивтер сатып алу мәмілесінің арқасында жоспарланған көрсеткіштерден асып түседі.
Қорда SKAI нейрожелісіне Директорлар кеңесі қараған мәселелер бойынша 2008 жылдан бастап барлық ақпарат жүктелгені атап өтілді.
«Нейрожелі нақты уақыт режимінде қаржылық, операциялық және нарықтық деректерді өңдеуге, заңдылықтарды анықтауға, тәуекелдер мен салдарларды болжауға, сондай-ақ күн тәртібіндегі әрбір мәселе бойынша негізделген ұсыныстарды қалыптастыруға және шешімдер қабылдауға қабілетті. SKAI аналитикасының дәлдігі мен тәуелсіздігі адами фактордың әсерін едәуір төмендетеді және корпоративтік басқарудың ашықтығын арттырады. Барлық деректер толығымен Қазақстанда орналасқан «Қазақтелеком» АҚ GPU-кластеріндегі қорғалған ортада сақталады», — делінген хабарламада.
Отырыста сондай-ақ «Таза Қазақстан» президенттік бастамасының іске асырылу барысы туралы ақпарат тыңдалды. Іс-шаралар аясында қор тобының компанияларының қызметкерлері шамамен 1 млн ағаш отырғызуды жоспарлап отыр. Сондай-ақ инклюзия, спорт және медицина саласындағы әлеуметтік жобаларды іске асыру жалғасуда. Жыл соңына дейін Маңғыстау және Батыс Қазақстан облыстарында жаңа спорт кешендерін ашу жоспарлануда.
Отырыс қорытындысы бойынша Премьер-министр қор басшылығына инфрақұрылымдық нысандарды уақтылы тапсыруды қамтамасыз етуді және сатып алудағы қазақстандық үлесті арттыра отырып, отандық өндірушілерге қолдауды күшейтуді тапсырды.
Еске салайық, бұған дейін «Самұрық-Қазына» қоры Президент Қасым-Жомарт Тоқаевқа аймақтағы дауыс беру құқығы бар алғашқы цифрлық тәуелсіз директорлар кеңесінің мүшесі болған SKAI нейрожелісін таныстырды. Тұсаукесер Астанада халықаралық Digital Bridge форумы аясында өтті.
Кейінірек Мәжіліс депутаты Екатерина Смышляева жасанды интеллектіні мемлекеттік лауазымдарға тағайындау мүмкіндігін жоққа шығарды. Ол қолданыстағы заңнама мұндай сценарийге жол бермейтінін мәлімдеді.