Шымкент қаласының Қаржы мониторингі агенттігінің (ҚМА) департаменті прокуратураның үйлестіруімен «Аяла Голд» қаржы пирамидасының қызметін тоқтатты.
Ведомствоның баспасөз қызметінің мәліметінше, заңсыз ұйым зергерлік бұйымдарды сатумен айналысатын компанияның атын жамылып жұмыс істеген.
Күдіктілер азаматтарға айына 50–60% кепілдендірілген табыстылықпен инвестиция салуды ұсынып, салынған қаражаттың сақталуына уәде берген.
Іс жүзінде төлемдер жаңа қатысушылардан түскен қаражат есебінен жүзеге асырылған. Нәтижесінде қаржы пирамидасына 400-ден астам салымшы тартылып, олар 1 млрд теңгеден астам қаражат салған. Күдіктілер қылмыстық табыстарына екі пәтер сатып алған, сот санкциясымен тергеу оларға тыйым салды.
Сонымен қатар, іске қатысты адамдар өз туыстарын «дроппер» ретінде пайдаланып, схемаға тартқан. Олардың банктік деректемелері арқылы салымшылардан түскен қаражатты қолма-қол ақшаға айналдырған. Қаржы пирамидасын ұйымдастырушы 2 айға қамауға алынды.
ФБРК редакциясы күмәнді инвестициялық схемаларға сенбеуге және қаржы пирамидаларына қатыспауға кеңес береді. Есіңізде болсын: өте жоғары табыстылық туралы уәделер әрқашан алаяқтықтың белгісі болып табылады. Абай болыңыз және тез пайда табу үшін жинақтарыңызды қатерге тікпеңіз.