Шымкентте өңірлік тексеру комиссиясы бюджет қаражатының 164 млрд теңгеге жуығын тиімсіз пайдаланғанын анықтады. Бұған дейін жүргізілген аудит тек 122,6 млрд теңгені ғана анықтаған болатын.
Өңірлік тексеру комиссияларының жалпы тиімділігі жоғары бағаға ие болмады. Жоғары аудиторлық палатасы (ЖАП) баспасөз қызметінің мәліметінше, ведомстводағы 20 тексеру комиссиясының тек 11-інің (55%) қызметі тиімді деп бағаланған. Қалғандары «қанағаттанарлық» деген баға алды.
«Негізгі параметрлердің бірі – мемлекеттік аудит объектілерінің тізбесіне енгізілген өзгерістер көлемі. 10% шегіндегі ауыстыру оң бағаланады, ал 10%-дан жоғарының бәрі бұзушылық болып саналады, өйткені бұдан үлкен сыбайлас жемқорлық тәуекелдері жатыр. 2023 жылы ШҚО, СҚО және Қостанай облысының тексеру комиссиялары жыл ішінде өз тізбелерін 10-нан 30%-ға дейін жаңартты. Түркістан облысында ең үлкен ауытқу тіркелді – бірден 38%», - делінген хабарламада.
Сонымен қатар ЖАП төрағасы Әлихан Смайылов ішкі мемлекеттік аудит комитеті тарапынан камералдық бақылау сапасын арттырудың маңыздылығын атап өтті.
Өткен жылы мемлекеттік органнан хабарламалар негізсіз жиі жіберіле бастады, ал бұл, оның айтуынша, тексеру объектілеріне және қызметкерлердің өздеріне қосымша жүктеме тудырады.
«Шағымдардың 42%-ы тексеру объектілерінің пайдасына расталған жағдай камералдық бақылаудың нашар жұмыс істейтінін білдіреді. Бұл мүлдем болмауы керек. Комитет қателіктермен жұмыс жүргізуі кейін расталмайтын хабарламалар субъектілерге бармауы үшін камералдық бақылаудағы қатер профильдерін, параметрлерін түзетуі қажет. Бұл уақыт пен қаражаттың босқа кетуі, тексерілушілерге жүктеме», – деді Әлихан Смайылов.