В Шығыс Қазақстан облысында «Сергек» зияткерлік қоғамдық және жол қауіпсіздігі жүйесі төңірегіндегі дау жалғасуда.
Sergek Group компаниясы 2024 жылғы шілдеде мемлекеттік-жекешелік әріптестік (МЖӘ) келісімшарты аяқталғаннан кейін аймақта бағдарламалық қамтамасыз етусіз жұмыс істемейтін камераларды қалдырды деген мәлімдемелерді жоққа шығарды.
Еске салайық, 2018 жылы Sergek Group құрамына кіретін «Көркем Телеком» ЖШС жолаушылар көлігі басқармасымен, ШҚО полиция департаментімен және Ақпараттық технологиялар орталығымен бес жыл мерзімге «Сергек» жүйесін ұсыну бойынша МЖӘ келісімшартын жасасты. Негізгі мерзім аяқталғаннан кейін келісімшарт тағы екі айға – 2024 жылғы 30 маусымға дейін ұзартылды.
Жағдайдың шиеленісуі өткен жылдың тамыз айында, Sergek Group коммуникациялар директоры Әсел Құжахметова компанияны «біліктілік талаптарына сәйкес келмеуіне» байланысты жаңа тендерге жібермегенін мәлімдеген кезде басталды.
Сонымен қатар, компания мемлекеттік сатып алу процесінде ықтимал бұзушылықтар болғанын мәлімдеп, уәкілетті органдарға шағымдар жіберді. Өз кезегінде, ШҚО жолаушылар көлігі басқармасы конкурс шарттары барлық қатысушылар үшін бірдей болғанын алға тартты.
Конкурстық рәсімдердің сақталуын тексеруді ішкі мемлекеттік аудит департаменті (ІМАД) және ішкі мемлекеттік аудит комитеті (ІМАК) жүзеге асырды. ІМАД тексеру қорытындысы бойынша бұзушылықтар анықталмады.
Өткен жылдың желтоқсан айында Шығыс Қазақстан облысының әкімі Ермек Көшербаев компания барлық жабдық пен желілерді бөлшектеп, тек «жалаңаш камераларды» қалдырғанын мәлімдеді.
Оның айтуынша, билік «Сергек» жүйесінің әзірлеушісі – «Көркем Телеком» ЖШС-не жаңа мердігер жабдықты орнатқанға дейінгі кезеңде жүйеге қызмет көрсетуді жалғастыруды ұсынған, алайда компания бас тартқан.
Өз кезегінде, Sergek Group өкілдері келісімшарт аяқталғаннан кейін мемлекеттік әріптеске жабдықты, есептік деректер мен кіру парольдерін қоса алғанда, жүйенің барлық құрамдас бөліктерін тапсырғанын мәлімдеді.
Олардың айтуынша, жүйе толық функционалдылығын сақтаған, ал оның ескіргені туралы мәлімдемелер шындыққа сәйкес келмейді.
Sergek Group даулы мәселелерді заң аясында шешуге және өз құқықтарын сот тәртібімен қорғауға дайын екенін атап өтті.
ШҚО әкімдігінде жаңа мердігер – «Satory Company LTD» ЖШС – қызметтердің кең ауқымын ұсынатынын, ең бастысы аппараттық-бағдарламалық кешен мемлекетке тиесілі болатынын атап өтеді.
Еске салайық, өткен жылдың маусым айында ФБРК редакциясы Freedom Telecom және Sergek Group бірлесіп әзірлеген автомобиль жолдарындағы зияткерлік бақылау жүйесі (АЖБЖ) жобасы туралы егжей-тегжейлі баяндаған болатын.
Сондай-ақ, біз пайдаланудың бүкіл кезеңі ішінде қауіпсіздік пен тиімділік туралы көптеген даулардың нысанасы болған «Сергек» зияткерлік қоғамдық және жол қауіпсіздігі жүйесі жобасын талдадық.