Сарани әкімі Еркін Баулыков жұмыстан босатылған соң Президент Қасым-Жомарт Тоқаев Қарағанды облысының әкімі Ермағанбет Бөлекпаевқа сөгіс жариялады.
Бұл туралы Президенттің баспасөз хатшысының кеңесшісі Берік Уәли Facebook-тегі парақшасында хабарлады.
«Мемлекет басшысы Қасым-Жомарт Тоқаев Қарағанды облысының әкімі Ермағанбет Бөлекпаевқа жылыту маусымына дайындық барысын тиісті бақыламағаны үшін сөгіс жариялады», - делінген хабарламада.
Еске салайық, 13 қазанда Сарани тұрғындары пәтерлердің суықтығына жаппай шағымдана бастады. Келесі күні қала әкімі Еркін Баулыков қаланың уақытша ескі жергілікті қазандықтарға оралатынын мәлімдеді.
15 қазанда үкімет отырысында Сарани қаласындағы жылыту проблемалары қаралды. Премьер-министр Олжас Бектенов кінәлілер жауапқа тартылатынын айтты. Сонымен қатар, Сарани тұрғындарына қазан айында жылумен жабдықтау үшін қайта есеп жүргізу уәде етілді.
17 қазанда энергетика министрі Алмасадам Сатқалиев Саранидің тұрғын үйлері мен әлеуметтік нысандарының жылумен жабдықтау жүйелеріне толық қосылғанын хабарлады.
28 қазанда Сарани әкімі Еркін Баулыков, Қарағанды облысының энергетика және тұрғын үй-коммуналдық шаруашылық басқармасының басшысы Тілектес Досаев, сондай-ақ облыс әкімінің бірінші орынбасары Азамат Тайжанов жылыту маусымына дайындықты тиісті бақыламағаны үшін облыс әкімінен қатаң сөгіс алды.
29 қазанда Сарани әкімі қызметінен босатылды. Оның міндетін атқарушы етіп Максат Қайрешов тағайындалды.