Үкімет отырысы барысында премьер-министр Олжас Бектенов бірқатар өңірдегі энергокәсіпорындардың жөндеу жұмыстарын жылыту маусымына уақытылы аяқтамау тәуекелдеріне назар аударды.
Ведомство баспасөз қызметінің мәліметінше, Ақмола облысындағы Степногор ЖЭО-да резервтік қазандықты жөндеу аяқталмаған. Маңғыстау облысындағы ЖЭО-2-де екі турбинаны жөндеу мерзімі кейінге шегерілген. Ақтау жылу желілерін қайта жаңарту жұмыстарының қарқыны төмен екендігі атап өтілді.
Үкімет басшысының айтуынша, мұндай проблемалар әр өңірде байқалады.
«Жүргізіліп жатқан жұмысты барынша жеделдету қажет. Бұл жағдай әкімдер тарапынан жоспарлаудың әлсіздігі мен қатаң бақылаудың жоқтығын көрсетеді», — деп атап өтті Олжас Бектенов.
Сонымен қатар премьер-министр KEGOC компаниясының энергия көздерін жөндеу мерзімдерін ұзартуға рұқсат беру фактілері туралы хабарлады. Осы жылдың мамыр айында үкімет мұндай тәжірибені болдырмауды тапсырған болатын.
«Әкімдерге энергокәсіпорындардың жылыту маусымына дайындығын бағалау жөніндегі комиссияға жеке қатысуы қажет. Олардың қысқа дайындық паспортынсыз жұмыс істеуіне жол берілмейді», - деп атап көрсетті үкімет басшысы.
Бектенов, егер жылыту маусымы дайындық паспортынсыз басталса, кінәлілердің жауапкершілікке тартылатынын ескертті.
Сонымен қатар үкімет басшысы жылыту маусымы бойынша өңірлік штабтардың жұмысын қайта бастауды және Риддер, Кентау, Екібастұз және Ақтау қалаларының энергия көздерін ерекше бақылауда ұстауды тапсырды.
«Жылыту маусымын өткізу бойынша өңірлік штабтардың жұмысын қайта бастауды тапсырамын. Энергия көздері мен желілерінің жұмысын үнемі тексеріп отыру қажет. Жылыту маусымы ауа райы жағдайларын ескере отырып, белгіленген мерзімдерде қатаң басталуы тиіс», – деп атап өтті Олжас Бектенов.
Премьер-министр энергетика министрлігіне өңір әкімдіктерімен бірлесіп, жылу көздері мен жылу желілерінің жөндеу жұмыстарын уақытылы аяқтауды қамтамасыз етуді тапсырды.
Энергетика министрлігіне, «Қазақстан темiр жолы» ҰК» АҚ (ҚТЖ) және өңір әкімдіктеріне энергия объектілеріне көмір мен мазутты уақтылы жеткізуді қамтамасыз ету, сондай-ақ халықты көмірмен қамтамасыз етуді бақылауға алу міндеті қойылды.
Өнеркәсіп және құрылыс министрлігі мен жергілікті әкімдіктер 1 қыркүйекке дейін білім беру объектілерінің, ал 15 қазанға дейін денсаулық сақтау, тұрғын үй-коммуналдық шаруашылық және тұрғын үй қоры объектілерінің толық дайындығын қамтамасыз етуге міндеттелді.
Оқу-ағарту, денсаулық сақтау, ғылым және жоғары білім министрліктеріне де бұл мәселені бақылауға алу тапсырылды.