Энергетика министрі Алмасадам Сатқалиев көптеген ЖЭО-дағы жөндеу жұмыстарының кешігуіне байланысты бірқатар өңірдің жылыту маусымына дайындалуға үлгермеуі мүмкін екенін хабарлады.
ORDA мәліметінше, үкімет отырысында энергетика министрі Қазақстандағы бірнеше электр станциясында жөндеу жұмыстарын уақытында бастамағанын айтты.
«Жамбыл облысындағы "Таразэнергоорталық" АҚ ЖЭО-4, Қарағанды облысындағы "Qarmet" АҚ ЖЭО-2, Топар ГРЭС-і, сондай-ақ Павлодар облысындағы "Павлодарэнерго" АҚ электр станцияларында негізгі жабдықтарды жөндеуді бастау мерзімдерінің сақталмауы», - деді Алмасадам Сатқалиев.
Сонымен қатар ол жылыту маусымына дайындық кезінде ерекше назар аударуды қажет ететін бірінші кәсіпорын – Риддердегі ЖЭО екенін атап өтті. Өткен қыста суық батареяларға байланысты қала тұрғындары үйде жылы киім киюге мәжбүр болды.
«Риддер ЖЭО-да №5 қазандықты жөндеуді бастауды жеделдету қажет, оны жөндеуге әлі кіріскен жоқ. Айналым су құбырын ауыстыруды, №4 турбинаны жөндеуді және күл үйіндісін тазалауды белгіленген мерзімде аяқтау маңызды», - деп нақтылады министр.
Сондай-ақ Алмасадам Сатқалиев шұғыл жөндеуді қажет ететін келесі нысан – Екібастұз ЖЭО екенін мәлімдеді. 2022 жылғы қарашада және 2023 жылғы қаңтарда жылу желілеріндегі апаттар мен қазандықтардың тоқтауы салдарынан ондаған үй 35 градустық аязда жылусыз қалды.
Сонымен қатар, проблемалы нысандар тізімінде Теміртау, Жезқазған, Кентау және Степногорск қалаларындағы ЖЭО, сондай-ақ "МАЭК" ЖШС электр станциялары бар. Оларды жөндеу мерзімдері жаздың соңы мен күздің басына ауыстырылды, сонымен қатар жаңа қазандықтарды орнатуда кешігулер бар.
Энергетика министрінің баяндамасынан кейін премьер-министр Олжас Бектенов бірқатар тапсырмалар берді.
«Жалпы, жылыту кезеңіне дайындық бойынша жұмыстың жеткіліксіз тиімділігін атап өтемін», - деді премьер-министр.
Сонымен қатар үкімет басшысы өнеркәсіп және энергетика министрліктеріне, сондай-ақ өңір әкімдіктеріне 1 қыркүйекке дейін барлық ЖЭО мен қазандықтарды отынмен қамтамасыз етуді тапсырды.
Еске сала кетейік, бұрын СҚО жылу желілерін күрделі жөндеуге 17,6 млрд теңге бөлу жоспарланғаны хабарланған болатын.