Павлодар облысы бойынша Қаржылық мониторинг агенттігінің (ҚМА) Департаменті жүкті әйелдерді жалған жұмысқа орналастыру және әлеуметтік төлемдерді заңсыз алу схемасы бойынша тергеу жүргізіп жатыр.
Ведомствоның баспасөз қызметінің мәліметінше, мемлекеттік зейнетақы төлеу орталығы (МЗТО) бөлімінің басшысы схеманы жүзеге асыруға өзінің туысын — бірнеше кәсіпкердің ЭЦҚ-сына қол жеткізе алған бухгалтерді тартқан.
Бухгалтер иелерінің рұқсатынсыз цифрлық қолтаңбаларды пайдаланып, жұмысқа қабылдау туралы бұйрықтарды, есеп айырысу ведомостарын және заңды жұмысқа орналасуды имитациялайтын басқа да құжаттарды ресімдеген.
Тергеу атап өткендей, схемаға басқа да адамдар тартылған. Күдіктілердің таныстары жүкті әйелдерді іздеп, оларды әлеуметтік төлемдер алуға мүмкіндік беретін ресімдеудің заңдылығына сендіргені хабарланады.
Жалған мәліметтер негізінде уәкілетті мемлекеттік органдар жәрдемақыларды тағайындаған, содан кейін ақшалай қаражат схемаға қатысушылар арасында бөлінген.
Тергеу деректері бойынша, 13 кәсіпкердің атынан 50-ден астам жүкті әйелге төлемдер ресімделген, ал әрқайсысына жәрдемақы мөлшері 6 млн теңгеден асқан. Мемлекетке келтірілген жалпы залал 200 млн теңгеден асқан.
Сот санкциясымен күдіктілердің мүлкіне, оның ішінде үш автокөлікке тыйым салынды. Тергеу жалғасуда.
Еске сала кетейік, бұған дейін хабарланғандай, Шымкент тұрғыны кәсіпкерлердің ЭЦҚ кілттерінің көмегімен жүкті әйелдерді кәсіпорындарға жалған жұмысқа орналастырған. Заңсыз әрекеттердің нәтижесінде мемлекетке 217 млн теңге көлемінде залал келтірілген.