Солтүстік Қазақстан облысының прокурорлары қоныс аудару бағдарламасы бойынша бюджет қаражатын ұрлау фактілерін анықтады.
Облыстық прокуратура баспасөз қызметінің мәліметінше, Г. Мусрепов ауданы, сондай-ақ Айыртау және Жамбыл аудандарының қоныс аудару бағдарламасына қатысушылар мемлекеттік өтемақының ең жоғары мөлшерін алу үшін тұрғын үйдің нақты құнын жасанды түрде көтерген.
Бұл әрекеттер мемлекетке жалпы сомасы 11,3 млн теңге залал келтірген. Осы фактілер бойынша прокурорлар ҚК-нің 190-бабы «Алаяқтық» бойынша сотқа дейінгі тергеулерді бастады.
Нәтижесінде аудандық сот бағдарламаның үш қатысушысын кінәлі деп танып, оларға бір жылдан үш жылға дейінгі мерзімге бас бостандығын шектеу түріндегі жаза тағайындады.
Сонымен қатар, мемлекеттен материалдық көмек алған қоныс аудару бағдарламасына қатысушылар қоныс аудару орнынан басқа өңірлерге тұрақты тұруға көшкен. Осыған қарамастан, жергілікті атқарушы органдардың (ЖАО) лауазымды тұлғалары 103,6 млн теңге көлеміндегі бұл төлемдерді өндіріп алу бойынша шаралар қолданбаған.
Прокурорлық қадағалау актілері бойынша ЖАО-ның 25 лауазымды тұлғасы, оның ішінде Мансап орталықтары филиалдарының 11 басшысы тәртіптік жауапкершілікке тартылды. Бюджетке 19,1 млн теңге қайтарылды. Қалған сома сот арқылы өндірілуде.