ФБРК редакциясы Қазақстанның өңірлеріндегі 2024 жылғы ірі мемлекеттік сатып алуларды талдауға арналған материалдар сериясын бастайды.
Біздің назарымызға бірінші болып Қостанай облысы ілікті, мұнда біздің пікірімізше, ең қымбат келісімшарттар коммуналдық қызметтер, білім беру, спорт және жылжымайтын мүлік салаларында болды. Олардың әрқайсысымен егжей-тегжейлі танысайық.
РУДНЫЙДЫ ЖЫЛУМЕН ҚАМТАМАСЫЗ ЕТУ: 4,02 МЛРД ТЕҢГЕ
Маусым айында «Рудный жылу желілері» ЖШС «Соколов-Сарыбай кен-байыту өндірістік бірлестігі» АҚ пен 2024 жылға Рудный қаласын жылумен жабдықтау қызметтері бойынша шарт жасасты. Келісімшарт сомасы әсерлі болғанымен, іс жүзінде 1,25 млрд теңге ғана төленді.
Айта кетерлігі, компаниялар қатарласып химиялық тазартылған су өндіру бойынша 812,5 млн теңге сомасына келісімшартқа қол қойды, оның ішінде нақты 200 млн теңге ғана жұмсалды.
Атап өтейік, Рудный қаласының жылу желілерін ауқымды жаңғырту аясында 2024 жылы 20 км желі ауыстырылып, апаттылық 41%-ға едәуір төмендеді, ал магистральдық желілерде апаттар тіркелмеген.
2025 жылы қалада жоспарланып отырғандай, жеке сектордағы тоқсандық желілерге баса назар аудара отырып, тағы 18,6 км желіні ауыстыру көзделген, бұл жалпы тозуды 53%-ға дейін төмендетуге мүмкіндік береді. Одан әрі қайта жаңғырту 2026-2028 жылдары әзірленіп жатқан жобалық-сметалық құжаттамаға сәйкес жалғасатыны хабарланады.
ФУТБОЛДЫҚ АМБИЦИЯЛАР: 1,6 МЛРД ТЕҢГЕ
2024 жылы Қостанай облысының дене шынықтыру және спорт басқармасы футболды дамытуға айтарлықтай қаражат салды. Наурызда «Тобыл» футбол клубы» қоғамдық қорымен команданы республикалық жарыстарға дайындау және қатыстыру үшін 1,2 млрд теңге сомасына келісімшарт жасалды.
Сәуірде балалар футбол орталығын ұйымдастыру үшін 447 млн теңгеге ұқсас келісімшартқа қол қойылғанын атап өткен жөн. Екі шарт та 30 пайыздық авансты көздеді.
ӘКІМШІЛІК ҒИМАРАТЫ: 1,55 МЛРД ТЕҢГЕ
Қараша айында Қостанай ауданының білім бөлімі «RInna» ЖШС-нен Тобыл қаласында жер телімі бар әкімшілік ғимаратты сатып алды. Мәміле бір көзден сатып алу әдісін таңдау және шарттың орындалуын қамтамасыз етудің болмауына байланысты сұрақ туғызады.
Айта кетерлігі, бұрын нысан кафе ретінде жұмыс істеген, бірақ 2023 жылы әкімшілік қажеттіліктерге қайта жаңартылған. Тәуелсіз бағалау бойынша, ғимараттың нарықтық құны 1,655 млрд теңгені құрады, бұл сатып алу бағасынан 105 млн теңгеге жоғары.
МЕДИЦИНАЛЫҚ БІЛІМ БЕРУ: 1,46 МЛРД ТЕҢГЕ
2024 жылы облыстың денсаулық сақтау басқармасы мамандар даярлау үшін Қостанай жоғары медициналық колледжімен екі шарт жасасты: біріншісі қаңтарда 1,16 млрд теңге сомасына, екіншісі қазанда 303 млн теңгеге. Келісімшарттар студенттерді бес медициналық мамандық бойынша оқытуды көздейді. Алайда, шығыстардың егжей-тегжейлі негіздемесінің және білім сапасын бағалаудың нақты критерийлерінің болмауы сенім ұялатпайды.
ГАЗБЕН ЖАБДЫҚТАУ: 165 МЛН ТЕҢГЕ
«Затобол жылу энергетикалық компаниясы» коммуналдық кәсіпорны «QAZAQGAZ AIMAQ» АҚ-мен жылу энергиясын өндіру үшін табиғи газды жеткізу бойынша көлемі 3 млн текше метрге жуық шарт жасасты. Ал, осы сатып алу бойынша құжаттама күрделі сұрақтар туғызады.
Атап айтқанда, негізгі шарт 2024 жылғы жеткізілімге қатысты болса да, 2022 жылмен мерзімделген. Сонымен қатар, техникалық қателерді түзетуге, тарифтерді өзгертуге және жеткізу көлемдерін түзетуге байланысты үш қосымша келісім жасалған. Бұл ретте, көрсетілген 165 млн теңге сомасына қарамастан, мемлекеттік сатып алу порталында шарт бойынша нақты төлемдер туралы деректер жоқ.
ҚОРЫТЫНДЫ
Қостанай облысындағы ірі мемлекеттік сатып алуларды талдау жалғыз жеткізушіден сатып алудың басымдылығын және шарттық және іс жүзінде төленген сомалар арасындағы елеулі алшақтықты көрсетеді.
Редакция мемлекеттік сатып алу саласындағы жағдайды бақылауды жалғастырады және келесі материалдарда еліміздің басқа өңірлерінің талдауын ұсынады.
Жалғасы бар…