Қаржылық мониторинг агенттігінің (ҚМА) Абай облысы бойынша департаменті «Damu Bala» платформасы арқылы балалар шығармашылығын дамыту жөніндегі мемлекеттік бағдарламаны іске асыруға бөлінген бюджет қаражатын жымқыру фактісі бойынша тергеуді аяқтады.
Ведомствоның баспасөз қызметінің мәліметінше, «SAMGAU өнер&спорт мектебі» ЖШС директоры шығармашылық үйірмелер мен спорт секцияларын жан басына шаққандағы қаржыландыру бағдарламасына балалармен сабақтар туралы жалған мәліметтер ұсынған.
Ай сайынғы жалған келу есептері негізінде уәкілетті орган жұмыс істеп тұрған үйірмелерді қаржыландырған.
Есептілікте іс жүзінде сабаққа қатыспаған балалар көрсетілген, ал олардың кейбіреулері бағдарламаға қатысуы туралы мүлде білмеген.
Мысалы, балалардың бірі Алматы облысында тұратынына және ешбір үйірмеге қатыспағанына қарамастан, Абай облысындағы кескіндеме үйірмесінің мүшесі болып тіркелген.
Сот Серіктестік директорын кінәлі деп танып, оған 6 жыл шартты түрде бас бостандығынан айыру жазасын тағайындады. Сотталған адам мемлекетке келтірілген 23 млн теңге көлеміндегі залалды толық өтеді. Үкім заңды күшіне енген жоқ.
Еске сала кетейік, бұған дейін Астанада мемлекеттік бағдарламаларға қатысуды сылтауратып, 1 млрд теңгеден астам сомаға алаяқтық схемасын ұйымдастырған екі әйелге үкім шығарылды.