1 мамырдан бастап Қазақстанда жедел жәрдемнің мобильді бригадаларының жұмыс тәртібі өзгереді.
«Жедел жәрдемнің келуін ұзақ күтуге шағымдануларға байланысты және шұғыл қызмет жұмысының тиімділігін арттыру мақсатында денсаулық сақтау министрлігі төртінші шұғылдылық санатындағы шақыртуларға қызмет көрсететін емханалар жанындағы мобильді бригадалардың жұмыс қағидаларына өзгерістер енгізеді», - деп хабарлады денсаулық сақтау министрлігінің баспасөз қызметі.
Төртінші шұғылдылық санатындағы шақыртулар пациенттің өміріне қауіп төндірмейтін, бірақ медициналық араласуды қажет ететін жағдайларға қатысты екені атап өтілді.
1 мамырдан бастап не өзгереді:
- емханалар жанындағы мобильді бригадалар олардың жұмыс уақытында — сағат 8:00-ден 20:00-ге дейін жұмыс істейді;
- өмірге қауіп төндірмейтін төртінші шұғылдылық санатындағы шақыртулар (мысалы, жоғары қан қысымы, қызба, жеңіл жарақаттар) емханалардың жұмыс уақытында алғашқы медициналық-санитарлық көмек (АМСК) мобильді бригадаларына қайта бағытталады;
- сағат 20:00-ден кейін және демалыс күндері төртінші санатты қоса алғандағы барлық шақыртуларға бұрынғыша жедел жәрдем бригадалары қызмет көрсетеді.
Белгілі болғандай, жедел жәрдем шақыртуларының 50%-дан астамы төртінші шұғылдылық санатына жатады және созылмалы аурулардың асқынуына байланысты.
«Мойындау керек, мұндай шақыртулар өмірге қауіп төндіретін, дереу көмек қажет ететін жағдайдағы пациенттерден ресурстарды бұрып әкетеді», - делінген хабарламада.
Өзгерістер жүктемені оңтайландыруға, күту уақытын қысқартуға және бүкіл жедел жәрдем жүйесінің тиімділігін арттыруға мүмкіндік береді деп күтілуде.
«Енді алғашқы медициналық-санитарлық көмектің мобильді бригадалары шақыртуларға шығып, пациенттерге үйде жоспарлы баруларды жүзеге асырады. Бұл азаматтардың денсаулық жағдайын уақтылы бақылауды және, әсіресе созылмалы аурулары бар пациенттерде, жағдайдың нашарлауына жедел ден қоюды қамтамасыз етуге мүмкіндік береді», - деп атап өтті денсаулық сақтау министрлігінде.
Белгілі болғандай, АМСК мобильді бригадалары 25 мың халыққа бір бригада есебінен құрылады. Олар пациенттің бекітілген жеріне қарамастан, оның тұрғылықты немесе нақты болған жері бойынша жұмыс істейді.
«Қажет болған жағдайда мобильді бригадаларға тар мамандар ілесе алады, атап айтқанда, балаларға педиатрдың қатысуымен, ересектерге — пациенттің жағдайының сипаты мен ауырлық дәрежесіне қарай тар мамандардың (кардиологтар, невропатологтар және басқа дәрігерлер) тартылуымен көмек көрсетілетін болады. Мұндай тәсіл неғұрлым сапалы мекенжайлық медициналық қызмет көрсетуді қамтамасыз етеді», - делінген хабарламада.
Ведомство жедел жәрдем шақыру тетігі бұрынғы қалпында қалатынын — 103 нөмірін теріп, азаматтар тәуліктің кез келген уақытында шұғыл медициналық көмек шақыра алатынын атап өтті. Пациенттің жағдайы өмірге қауіп төндіретін жағдайларда жедел жәрдем бригадасы апта күні мен тәулік уақытына қарамастан келеді.
«АМСК мобильді бригадасының шақыртуға келу уақыты — 60 минутқа дейін. Неғұрлым шұғыл санаттар үшін нормативтер қарастырылған: бірінші санаттағы шақыртулар үшін 10 минут, екіншісі үшін 15 және үшіншісі үшін 30 минут», - деп түйіндеді министрлікте.
Денсаулық сақтау министрлігінің деректері бойынша, биылғы жылдың бірінші тоқсанында жедел жәрдем қызметтері 2,1 млн-нан астам шақыртуға қызмет көрсетті. Ең көп өтініштер төртінші шұғылдылық санаты бойынша тіркелді — 763 463 шақырту, оның 518 мыңнан астамына АМСК мобильді бригадалары қызмет көрсетті. Бірінші санат бойынша шақыртулар саны 104 443, екіншісі бойынша — 642 312, үшіншісі бойынша — 574 580 шақыртуды құрады.