Шу аудандық сотында Мерке – Шу – Бурылбайтал трассасындағы жойылмаған ақаулар туралы іс бойынша шешім шығарылды. Мердігерлік ұйым нұсқаманы елемегені үшін 1,9 млн теңгеге айыппұл салынды. Бұл туралы Informburo.kz соттың баспасөз қызметіне сілтеме жасап хабарлады.
Істің алғы тарихы ақпан айында, жол полициясы қызметкерлері автожол учаскесінде 22 бұзушылықты тіркеген кезде басталды. Сәуір айында компанияға анықталған бұзушылықтарды 2025 жылғы мамырға дейін жою туралы нұсқама берілді, алайда ол орындалмады.
Сот отырысында мердігер өкілдері құжаттың кешігіп келгенін, сондай-ақ жол белгілерінің жоғары құнын және субмердігерлерді тарту қажеттігін алға тартты. Олар іс бойынша іс жүргізуді тоқтатуды сұрады.
Алайда сот бұл дәлелдерді қабылдамай, қаржылық немесе ұйымдастырушылық қиындықтар жауапкершіліктен босатпайтынын атап өтті. Нәтижесінде компания нұсқаманы орындамағаны үшін кінәлі деп танылып, 500 АЕК (1 966 000 теңге) мөлшерінде айыппұл төлеуге міндеттелді. Лицензия мен рұқсаттар сақталады. Қаулы әзірге заңды күшіне енген жоқ.
Айта кету керек, жолдардың сапасына қатысты мәселелер тек Жамбыл облысында ғана емес. Бұған дейін «ҚазАвтоЖол» түсіндіргендей, Павлодар және Түркістан облыстарындағы трассалардың көтерілуі құрылыс ақауына емес, ыстыққа байланысты. Компания жедел әрекет ететінін және ақауларды жою бойынша шаралар қолданып жатқанын жеткізді.