«М-НефтеСервис» ЖШС көлік компаниясы 85 тонна жалпы артық салмағы үшін 26,8 млн теңгеге айыппұл салынды. Бұған дейін Жамбыл облысы бойынша көліктік бақылау инспекциясының қызметкерлері тасымалдаушының салмақ пен көлем параметрлерінің артуы үшін төлем сомасын төмендету мақсатында заңды айналып өтуге тырысқанына күдіктенген.
Оқиға 13 қарашада БАҚ-та «М-НефтеСервис» ЖШС өкілдерінің шағымы жариялануынан басталды, онда 6 қарашада Жамбыл облысында көліктік бақылау инспекциясының қызметкерлері компанияның ауыр жүк көліктерін негізсіз ұстап, жүргізушілерден жүк тасымалына арналған барлық құжаттарды алып қойғаны, бұл көліктің көп күндік кешігуіне әкеп соқтырғаны хабарланған.
Көлік министрлігі бұл уақытқа дейін өткізу пунктіндегі оқиғалар хронологиясын қалпына келтіріп, инспекция қызметкерлерінің тасымалдаушының адалдығына күмән келтіруге толық негізі болған деген қорытындыға келген.
Ресми анықтамаға сәйкес, 6 қарашада «М-НефтеСервис» ЖШС-нің алты көлігі Жамбыл облысы бойынша көліктік бақылау бекетінен 150 метр қашықтықта өз бетінше тоқтаған. Олар Қытайдан Өзбекстанға жел генераторларының бөлшектерін тасымалдаған.
Заң бойынша рұқсат етілген параметрлерден асып кеткен кезде тасымалдаушы салмағы мен тасымалдау бағытына байланысты жол жүру ақысын төлей отырып, арнайы рұқсат алуға міндетті.
7 қарашада жүргізушілер өздері инспекция қызметкерлеріне шекара бекетінен алынған өлшеу актілерінің көшірмелерін көрсетіп, өлшеу рәсімін жүргізбестен әрі қарай өтуге тырысқан. Алайда көліктік бақылау инспекциясы ұсынылған құжаттардың түпнұсқалығына күмән келтірген.
8 қарашада тасымалдаушы басқа салмақ пен көлем параметрлері бар өзге актілердің көшірмелерін ұсынған. Ұсынылған барлық актілер заңнама талаптарына сәйкес келмеген және қатаң есептілік бланкілері болмаған. Бұл көліктік бақылау инспекторларында белгілі бір күдік туғызған.
Сол күні жамбылдық көлік прокуроры инспекцияға шектеу шараларын жою және аталған автокөлік құралдарының өлшеусіз өтуін қамтамасыз ету туралы қаулы шығарған.
Алайда көлік прокурорының шешіміне қарамастан, 13 қарашада Жамбыл облысы бойынша көліктік бақылау инспекциясы прокурордың қаулысына Бас және бас көлік прокуратуралары арқылы шағымданған.
Инспекция өз шешімін бұрын «М-НефтеСервис» ЖШС осыған ұқсас жүкті сол бағыт бойынша тасымалдағаны үшін 15 млн теңге сомасында ақы төлеп, арнайы рұқсат алғанымен түсіндірген. Ал бұл жолы ұқсас тасымалдау жағдайларында арнайы рұқсаттар бар болғаны 7,9 млн теңгеге ресімделген.
Нәтижесінде көлік министрлігінің көліктік бақылау инспекциясының қызметкерлері «М-НефтеСервис» ЖШС-нің ауыр жүк көліктерін өлшеу рәсімін жүргізген. Көлік құралдарының жалпы артық салмағы 85 тоннаны құрағаны анықталған. Осылайша компаниядан ел бюджетіне 26,8 млн теңгеден астам (оның ішінде 25 млн теңгеден астамы - артық салмақ үшін жинақ) өндірілген.
Көлік құралдарын өлшеу тасымалдаушы компания директорының, Бас көлік прокуратурасы өкілдерінің, геодезистің және «Сараптау және сертификаттау ұлттық орталығы» («НаЦЭкС») АҚ мамандарының қатысуымен жүргізілгені хабарланады.
Көліктік бақылау қорытындысы бойынша «М-НефтеСервис» ЖШС-не әкімшілік құқықбұзушылық туралы 22 хаттама жасалған, оның ішінде арнайы рұқсаттардағы салмақ параметрлерінің деректерін бұрмалау және лауазымды тұлғалардың қызметіне кедергі келтіру фактілері бойынша.
Белгілі болғандай, тек осы жылдың өзінде Қазақстанда арнайы рұқсатта көрсетілген салмақ параметрлерінен асатын ауыр салмақты автокөлік құралдарының 185 фактісі анықталған. Қосымша жинақтар мен айыппұлдардан 151 млн теңгеден астам өндірілген.
Көлік министрлігі ірі габаритті көлік құралдарының салмақ нормаларын сақтауын күшейту ниеті туралы хабарлап, автокөлік тасымалдаушыларын көлік заңнамасының талаптарын қатаң сақтауға шақырады.