Қазақстан өңірлерінің жартысын су тасқыны шарпыды. Нәтижесінде 100 мыңға жуық адамды тұрғылықты жерлерінен эвакуациялауға тура келді. Қалыптасқан жағдайдың күрделілігіне қарамастан, қазақстандықтар өз бірліктерін көрсете алды.
Қазір көпшілік қауіпсіз жерде, ал су басқан аумақтардан су қайтқан жерлерде тұрғындарды елді мекендерге қайтару процесі жүріп жатыр. Сонымен қатар, зардап шеккендердің шығынын анықтау жөніндегі комиссияның жұмысы басталды.
Президент Тоқаев бұған дейін мәлімдегендей, барлық зардап шеккендер көмек алады. Мемлекет тұрғын үй мен мүліктік шығынды толық көлемде өтейді. Жалпы, қазіргі жағдайдан белгілі бір қорытынды жасауға болады.
Біріншіден, билік азаматтарды эвакуациялау және су тасқыны салдарымен күресу үшін жедел түрде барынша күш жұмсады. Бұл ішкі резервтер есебінен жасалды, олардың ресурстары табиғи сипаттағы қауіп-қатерлерге әрекет ету үшін жеткілікті болып көрінеді.
Екіншіден, қоғам шетте қалмай, су тасқынына қарсы тұруда басты қатысушы ретінде өзін көрсетті. Он мыңдаған еріктілер су тасқыны болған жерлерде және көмек жинау пункттерінде жұмыс істеуде. Бей-жай қарамайтын азаматтар зардап шеккендерге заттар жинап, арнайы қорларға ақша қаражатын жіберуге бастамашылық етуде.
Қазақстандық компаниялар су тасқынынан зардап шеккендерге көмек көрсету туралы үкімет үндеуіне орай ақша бөлді . Ірі демеушілер қатарына: «Самұрық-Қазына» компаниялар тобы (15 млрд теңге), «Қазақстан халқына» қоры (5 млрд теңге), «Теңізшевройл» (2 млрд теңге), «Chevron Corporation» (3 млн АҚШ доллары) кірді.
Зардап шеккендерге көмектесуге «Freedom Holding», «Қазақмыс» және «KAZ Minerals», Болат Өтемұратов қоры, «Astana Motors», «BI Group», «Eurasian Resources Group», «Allur», «QazTehna» және «Qarmet», сондай-ақ Halyk, Kaspi kz, Jusan, ЦентрКредит, RBK және Евразия банкі сияқты банктер де шешім қабылдады.
Үшіншіден, саяси партиялар, қоғам қайраткерлері және зиялы қауым табиғи апатпен күреске тек қаржылай немесе ұйымдастырушылық жағынан ғана емес, сонымен қатар ақпараттық тұрғыдан да қатысты. Жағдай бойынша ресми дерек көздеріне деген сенім сақталып, жалған ақпарат пен арандатулар сынға алынып және теріске шығарылып жатыр.
Осылайша бірлік күрделі су тасқыны жағдайын сәтті еңсеруге ықпал етеді. Негізгі саяси және қоғамдық қатысушылардың бірігуі жұмысқа барлық әлеуетті күштер мен ресурстарды тартуға көмектеседі. Қазақстанда су тасқынының тезірек бітіп, оның салдарының барынша азаюына үміттенеміз.