Қызылорда облысында Байқоңыр қаласының прокуратурасы 2022–2024 жылдарға арналған білім беру ұйымдарында бюджет қаражатының жұмсалу заңдылығын талдау кезінде бюджет қаражатын жымқыру фактісін анықтағаннан кейін, мектептердің бірінің бас бухгалтері сотталды.
Ведомствоның баспасөз қызметінің мәліметінше, орта мектептің бас бухгалтері бірқатар оқытушылардың шоттарына жалақының асыра көтерілген сомасын жүйелі түрде аударып отырған. Кейін педагогтар оның өтініші бойынша артық аударылған ақшаны бухгалтердің жеке шотына қайтарған. Нәтижесінде мемлекеттік бюджетке 52 млн теңге көлемінде залал келтірілген.
Прокуратура ҚК-нің 189-бабы 4-бөлігінің 2-тармағымен («Бөтеннің сеніп тапсырылған мүлкін иемденіп алу немесе ысырап ету») қарастырылған қылмыс белгілері бойынша сотқа дейінгі тергеу жүргізді. Тергеу аяқталғаннан кейін іс сотқа жіберілді.
Нәтижесінде сот бас бухгалтерді кінәлі деп танып, оған 7 жыл бас бостандығынан айыру жазасын тағайындады. Жазаны өтеу 5 жылға кейінге шегерілді, себебі сотталушының кәмелетке толмаған балалары бар.
Еске салайық, бұған дейін хабарланғандай, Батыс Қазақстан облысы бойынша Қаржылық мониторинг агенттігінің департаменті «Батыс Қазақстан индустриялық колледжі» МКҚК бюджет қаражатын жымқыру фактісін тергеп жатыр.
Мекеме директоры ондаған оқушыны жалған тіркеуді ұйымдастырды деп күдіктелуде. Мемлекетке келтірілген залал алдын ала 49 млн теңгеден астам деп бағалануда.