Департамент Қаржылық мониторинг агенттігінің (ҚМА) Абай облысы бойынша «ELL QUATY» қаржы пирамидасының әрекетіне жол берілмегенін хабарлады.
Ведомство баспасөз қызметінің мәліметінше, ұйымдастырушылар өздерін «HALYK QUATY» тұтыну кооперативі ретінде таныстырып, азаматтарды пайлық жарналар арқылы, ақырында, үйлер мен автокөліктерді пайызсыз бөліп төлеу арқылы сатып аламын деген желеумен тартқан.
Жарнамалау интернет-сайт пен әлеуметтік желілер арқылы жүргізіліп, онда «Әр отбасына бақыт!» ұранымен «халықтық кооперативтің» бейнесі жасалған.
«HALYK» тауар белгісін заңсыз пайдаланғаны үшін әкімшілік жауапкершілікке тартылғаннан кейін кооператив атауын «ELL QUATY» деп өзгерткен.
Құрылым басшылығы салымшылар санын көбейту үшін, оның ішінде «Күн шуақты Түркия» туристік жолдамаларын ұтыс ойынын қоса алғанда, маркетингтік акцияларды үнемі іске қосып отырған.
Ақша ағындарын жасыру үшін ұйымдастырушы өз атына «QAZ INFO MARKET» ЖШС тіркеген. Хабарланғандай, компания шоттары арқылы салымшылардың қаражатын іс жүзінде көрсетілмеген кәсіби, ғылыми және техникалық қызметтерге ақы төлеу ретінде шығарып отырған.
Алдын ала мәліметтер бойынша, схемаға 1,5 мыңнан астам адам тартылған. Салынған қаражаттың жалпы сомасы 6,8 млрд теңгені құраған.
Қаржы пирамидасының ұйымдастырушысы қамауға алынды. Тергеу жалғасуда.