Қаржы мониторингі агенттігі (ҚМА) «Buyers Union» қаржы пирамидасының жұмысын тоқтатты, ол тұтыну кооперативі ретінде жасырылған болатын.
Ведомствоның баспасөз қызметінің мәліметінше, салымшыларды жылжымайтын мүлік, көлік сатып алуға инвестициялауға, сондай-ақ Trade in және ReFinance бағдарламаларына қатысуға көндірген.
Сонымен қатар, кооператив қаражат тартудан дивиденд алу мүмкіндігімен менеджер ретінде жұмысқа орналастыруды ұсынған.
Қатысушылар ай сайын өмірді сақтандыру деген желеумен 30 мың теңге және сатып алынатын мүлік құнының 10% мөлшерінде кіру жарнасын төлеп отырған.
Кооператив салымшыларға ақша алғаны туралы ешқандай растайтын құжат бермеген, ал салым сомасы тек пайдаланушылардың жеке кабинеттерінде көрсетілгені атап өтілген.
Белгілі болғандай, қаржы пирамидасының қызметіне 300 млн теңгеден астам инвестиция салған 250-ден астам салымшы тартылған.
Ұйымдастырушы екі ай мерзімге қамауға алынды. Сотқа дейінгі тергеу жалғасуда.
Еске салайық, бұған дейін Шымкент ҚМА департаменті «Nazira Gold» қаржы пирамидасының жұмысын тоқтатқан болатын. Күдіктілер өздерін зергерлік бұйымдар сататын компанияның өкілдері ретінде таныстырған. Тінту кезінде олардан қолма-қол 374 млн теңге, сондай-ақ құны 300 млн теңгеден астам 12 кг алтын бұйымдар алынды.