Шымкентте сыбайлас жемқорлық пен бюджет қаражатын жымқыру ісі бойынша айрықша сот талқылауы аяқталды. Алқабилердің қатысуымен өткен сот алдында бес айыпталушы – олардың арасында құқық қорғау органдарының, денсаулық сақтау басқармасының бұрынғы қызметкерлері, сондай-ақ кәсіпкер бар.
Шымкент соттарының баспасөз қызметінің мәліметінше, айыпталушылардың бірі құқық қорғау органында басшылық лауазымды атқара отырып, 2019–2020 жылдары жеке мектебіне қамқорлық жасағаны үшін кәсіпкерден 70 млн теңге көлемінде пара алған. Кейін ол ақшаны заңдастырып, екі пәтер сатып алып, оларды жалға беру мен сатудан кіріс алған.
Сонымен қатар, медициналық жабдықтарды мемлекеттік сатып алу конкурсы барысында денсаулық сақтау басқармасының қызметкері мен кәсіпкер 92 млн теңгеден астам қаражатты жымқырған. Қылмыс туралы біле тұра, құқық қорғау органының басшысы оны болдырмау шараларын қолданбай, жеке мүддесі үшін әрекет еткен.
Сонымен қатар, медициналық бұйымдар мен жабдықтарды сатып алу кезінде денсаулық сақтау басқармасы басшысының орынбасары лауазымдық өкілеттіктерін теріс пайдаланған.
Сондай-ақ, істе өзге де өкілеттіктерді теріс пайдалану және заңсыз кәсіпкерлік эпизодтары болған. Мәселен, жедел уәкілдердің бірі денсаулық сақтау басқармасының қызметкеріне сатып алуға қатысу үшін 7,5 млн теңге беріп, кейін 14,4 млн теңге пайда тапқан.
Нәтижесінде сот бұрынғы құқық қорғау органы басшысын пара алуда, кірістерді заңдастыруда және ауыр зардаптарға әкеп соққан қызметтегі әрекетсіздікте кінәлі деп таныды. Жасалған қылмыстардың жиынтығы бойынша оған 12 жыл бас бостандығынан айыру жазасы тағайындалды. Алқабилер көпшілік дауыспен оны алаяқтық пен пара беруге азғыру эпизодтары бойынша ақтады.
Денсаулық сақтау басқармасының қызметкері аса ірі мөлшерде бөтен мүлікті иемденгені үшін 7 жыл бас бостандығынан айыру жазасын алды. Көмектесуші деп танылған кәсіпкер 5 жыл мерзімге коммерциялық ұйымдарда басшылық лауазымдарды атқаруға тыйым салына отырып, 7 жылға шартты түрде бас бостандығынан айыруға сотталды.
Жедел уәкіл 1 жыл бас бостандығын шектеуге сотталып, амнистия актісінің негізінде жазадан босатылды. Денсаулық сақтау басқармасы басшысының орынбасары 4 жыл бас бостандығын шектеуге сотталды.
Сонымен қатар, төрт сотталғанға қосымша жаза – мемлекеттік қызметте лауазымдарды атқаруға тыйым салу тағайындалды.