Қарағанды облысы ұйымдасқан қылмысқа қарсы күрес басқармасының қызметкерлері «Қазақмыс Корпорациясы» ЖШС заңгері Азат Жұмабаевты ұстады.
«Қазақмыс» баспасөз қызметінің мәліметінше, ол бопсалауға күдіктелуде.
«Қазақмыс Корпорациясы» ЖШС Қауіпсіздік жөніндегі дирекциясы қызметкерлерінің қатысуымен, ҚР ҚК 194-бабы 1-бөлігінде «Бопсалау» көзделген қылмыстық құқық бұзушылық жасады деген күдікпен «Қазақмыс Корпорациясы» ЖШС заң қызметі департаментінің Орталық аймақтағы заң басқармасының келісімшарт-талап бөлімінің бастығы Жұмабаев Азат Мақсұтұлы ұсталды», - делінген хабарламада.
Айта кетейік, соңғы уақытта «Қазақмыс Корпорациясы» бөлімшелерінде жарақаттану жағдайлары туралы жиі белгілі болуда. Өткен жылдың екі айында ғана кәсіпорын шахталарында 4 адам қайтыс болды.
Еске салайық, 2023 жылғы қарашада компания шахтасында жұмыс істеу кезінде тау-кен шебері қайтыс болды.
Сол айда Жамбыл облысындағы компанияға да тиесілі «Жайсан» кенішінде тау-кен жүргізу жұмыстарын орындау кезінде екі маман қаза тапты.
Бір айдан кейін – желтоқсанда Ұлытау облысы компаниясының шахтасында тағы да бір жұмысшы қайтыс болды. Қайғылы оқиға «Жыланды» кенішінде болды.