Несие бюролары мемлекеттік кірістер комитетіне (МКК) микроқаржы және коллекторлық ұйымдар алдындағы жеке тұлғалардың берешегі туралы мәліметтерді бере бастайды. Бұл МКК мен несие бюролары арасында ақпарат алмасудың жаңа қағидаларын бекіткен қаржы министрінің бұйрығында көзделген. Құжат 10 қарашада күшіне еніп, ағымдағы жылдың 31 желтоқсанына дейін қолданылады.
«Параграф» АЖ деректері бойынша, МКК жыл сайын — есепті жылдан кейінгі жылдың 25 қарашасынан кешіктірмей — активтер, міндеттемелер, кірістер және мүлік туралы декларация тапсыруға міндетті жеке тұлғалардың тізімін қалыптастырады. Тізім есепті жылдың 31 желтоқсанындағы деректер негізінде жасалады.
Тізімді қалыптастырғаннан кейін 10 күнтізбелік күн ішінде МКК осы азаматтардың ЖСН-ін «Smart Data Finance» ақпараттық жүйесі арқылы несие бюроларына береді.
Деректерді алғаннан кейін несие бюролары 10 жұмыс күні ішінде МКК-ге коллекторлық және микроқаржы ұйымдары алдындағы берешек туралы мәліметтерді ұсынуға міндетті. Бұл мәліметтер тек декларация тапсыруға міндетті тұлғалар тізіміне енген азаматтарға қатысты.
Сонымен қатар, құжатта МКК мен несие бюролары жеке деректердің жариялануын немесе олардың жайылып кетуін болдырмай, салық, банк және өзге де заңмен қорғалатын құпияларды қорғау туралы заңнаманы сақтауға міндетті екені атап көрсетілген.