Қостанай облысында Бейімбет Майлин ауданының үш тұрғынына үкім шығарылды. Олар мал азығы мен селекциялық жұмысқа арналған мемлекеттік субсидияларды ұрлады деп танылды.
Облыстық прокуратура баспасөз қызметінің мәліметінше, тексеру барысында аса ірі көлемдегі алаяқтық фактілері анықталған. Айыпталушылар мал шаруашылығын қолдауға бөлінген 96 млн теңгеден астам қаражатты заңсыз иемденген.
Кінәні толық мойындауына байланысты сот қысқартылған тәртіппен өтті.
Нәтижесінде айыпталушылар әртүрлі мерзімге бас бостандығынан айырылып, сот залында қамауға алынды. Сонымен қатар, сотталғандардан мемлекет пайдасына 96 млн теңгеден астам сома өндірілді. Үкім әлі заңды күшіне енген жоқ.
Еске сала кетейік, бұған дейін хабарланғандай, Жетісу облысындағы ЖШС басшысы екі жыл бойы ауыл шаруашылығы басқармасынан сүт өнімдерін өңдеуге мемлекет бөлген субсидияларды заңсыз алған. Жалпы залал 300 млн теңгеден асқан.