Көкшетаудағы тағы бір мектеп 1 қыркүйекте оқушыларды қарсы алмады. Бұзылған №10 орта мектептің орнына 500 орындық жаңа ғимараттың құрылысы өткен жылдың қараша айында басталған болатын.
«HALYQSTAN» Telegram-арнасының мәліметінше, жоба бизнестің әлеуметтік жауапкершілігі аясында жүзеге асырылуда: нысанды салу және жабдықтауға арналған барлық шығыстарды бюджет қаражатын тартпай, «Қазмырыш» ЖШС өз мойнына алған. Дегенмен, ауқымды жоспарларға қарамастан, мектеп әлі күнге дейін пайдалануға берілген жоқ.
Құрылыстың басында-ақ мердігер ұйым «АлматыЭнергоКұрылыс» ЖШС-нің өкілі Талғат Хамитов компания нысанды мерзімінен бір жарым ай бұрын аяқтайтынына, ал жабдықталу деңгейі бойынша мектеп қазіргі заманғы «жайлы мектептермен» бәсекеге түсе алатынына сендірген. Бірақ уәделер орындалмады — нысан 1 қыркүйекке де, қазан айына да дайын болмады.
Жақында құрылыс алаңына қалалық мәслихат төрағасы Дастан Акимов және Көкшетау әкімінің орынбасары Айгүл Нүгертәліқызы барды. Тексеру барысында күрделі мәселелер анықталды.
Олардың бастылары — кестеден айтарлықтай артта қалу және құрылысшыларға еңбекақы бойынша берешек. Сонымен қатар, бас мердігердің алаңға іс жүзінде қатыспайтыны және тапсырыс беруші — қалалық құрылыс бөлімі тарапынан бақылаудың қамтамасыз етілмегені анықталды.
Еске сала кетейік, бұрын Көкшетауда облыстық «Білім – Инновация» мамандандырылған лицей-интернаты төңірегінде дау-дамай өршіген еді. Оқу жылының басында ата-аналар мен педагогтар жаңа корпустың ашылуын күткен, алайда мердігер тағы да тапсыру мерзімін бұзған. Екі апталық онлайн оқытудан кейін оқушыларды ескі ғимаратқа қайтаруға мәжбүр болды.