Алматы облысының прокуратурасы Алматы облысының түзеу мекемелерінде өрескел бұзушылықтарды анықтады.
Ведомствоның баспасөз қызметінің мәліметінше, сотталғандар ұялы телефондарды онлайн сатып алу, несие ресімдеу және букмекерлік кеңселер мен онлайн-казинолар арқылы құмар ойындарға қатысу үшін пайдаланған, мұнда ақша қаражатының жалпы айналымы 3 млрд теңгеден астамды құраған.
«Ұялы құрылғыларды пайдалана отырып, №10 мекеменің сотталғандары мекеме қабырғасында тыйым салынған және рұқсат етілген заттарды сатқан», - делінген хабарламада.
Осы факті бойынша Алматы облысының прокуратурасы ҚК-нің 361-бабы 2-1-бөлігі бойынша сотқа дейінгі тергеп-тексеру жүргізді. Нәтижесінде Іле аудандық сотының үкімімен осы мекеменің үш қызметкері әртүрлі жаза шараларына сотталды.
Сонымен қатар, облыс прокуратурасы №12 және №57 мекемелерінің қызметкерлеріне қатысты ҚК-нің 361-бабы 2-1-бөлігі бойынша сотқа дейінгі тергеп-тексерулер бастады, №57 мекеменің бастығы қамауға алынды.
«Анықталған деректер қылмыстық-атқару жүйесінде, соның ішінде мекеме қызметкерлерінің өздерінің қатысуымен бұзушылықтардың жалғасып жатқанын көрсетеді. Тергеу жалғасуда», - делінген хабарламада.