Алматы облысының Қаржылық мониторинг агенттігінің (ҚМА) Департаменті өңірге табиғи газ жеткізуді қамтамасыз ететін «Алматыгазсервис-Холдинг» АҚ ақша қаражатын жымқыру ісі бойынша тергеуді аяқтады.
Ведомство баспасөз қызметінің мәліметінше, компания қызметкерлері есептегіш көрсеткіштерін есепке алуды және тұтынушылардан қолма-қол ақша жинауды жүзеге асырған, содан кейін жиналған қаражатты материалдық жауапты тұлғаларға тапсырған.
Өз кезегінде директор, оның орынбасары, аға оператор және аға бақылаушы ақшаны кассаға тапсырмай, оларды иемденіп, төленген төлемдер туралы мәліметтерді «SymphonyGAS» есепке алу бағдарламасында жасырған.
Нәтижесінде екі жыл ішінде бір топ адам тұтынушылар төлеген 168 млн теңгені жымқырған.
Сот санкциясымен күдіктілердің 165 млн теңге сомасындағы мүлкіне – тұрғын үй, пәтер және автокөлікке – тыйым салынды.
Естеріңізге сала кетейік, былтырғы маусым айында «Алматыгаз» абоненттік есеп айырысу орталығы» ЖШС үстем жағдайын теріс пайдаланғаны үшін 83 млн теңгеге айыппұл салынды. Серіктестік газ жабдықтары мен газ тұтыну жүйелеріне жыл сайынғы техникалық қызмет көрсетуді жүргізбегені атап өтілді.