Жоғарғы Сот Кеңесі Қазақстанда 40 судья тәртіптік жауапкершілікке тартылғанын хабарлады. Олардың көпшілігі аудандық деңгейдегі мамандар.
24.kz ведомствоға сілтеме жасап хабарлағандай, негізгі себептер істерді қарау кезіндегі қателіктер, кәсіби этиканы сақтамау және міндеттерін тиісінше орындамау болды.
Белгілі болғандай, бір жыл ішінде Жоғарғы Сот Кеңесіне судьялардың шешімдерімен немесе сот актілерімен келіспеушілікке қатысты 2 мыңға жуық өтініш түскен.
«Судья тәртіптік жауапкершілікке тартылуы мүмкін: біріншіден – сот істері мен материалдарын қарау кезінде заңдылықты өрескел бұзғаны үшін, екіншіден – судьялық этикаға қайшы келетін теріс қылық жасағаны үшін. Соттар мен сот алқаларының төрағалары – сот жүйесі мен судьялардың мәртебесі туралы конституциялық заңда тікелей көзделген лауазымдық міндеттерін тиісінше орындамағаны үшін», - деп түсіндірді ҚР Жоғарғы Сот Кеңесі жанындағы Сот алқасының төрағасы Нұржан Қайыпжан.