Жамбыл облысында Арнайы мемлекеттік қор қаражаты есебінен сумен жабдықтау жобаларын іске асыру жалғасуда. Осы мақсаттарға үкімет 15,4 млрд теңге бөлді. Барлығы 12 жоба көзделген, оның төртеуі әзірге аяқталды, ал қалған сегізін ағымдағы жылдың соңына дейін тапсыру жоспарлануда.
Үкімет баспасөз қызметінің мәліметінше, Жамбыл ауданында Қызылшарық, Жаңаөткел және Жұма ауылдарында құрылыс аяқталды. Сонымен қатар, Талас ауданында 300-ден астам адам тұратын Қарой ауылында су құбыры пайдалануға берілді. Бұған дейін онда орталықтандырылған сумен жабдықтау болмаған.
Жобаның құны 933,4 млн теңгені құрады, оның 106,7 млн теңгесі Арнайы мемлекеттік қордан қаржыландырылды.
Тағы сегіз нысанда жұмыстар жалғасуда, оларды тапсыру жыл соңына дейін жоспарланған. Мойынқұм ауданында Шығанақ, Мынарал, Құмөзек станцияларында, сондай-ақ Мойынқұм, Биназар және Бірлік ауылдарында желілер қайта жаңартылуда.
Сарысу ауданында Жайылма және Маятас ауылдарында су құбыры жаңартылуда. Қордай ауданында Қарасай Батыр ауылында желілер салынуда.
Облыс қалаларында халықтың ауыз сумен қамтамасыз етілуі 98%-ға, ауылдық жерлерде — 99,3%-ға жеткені атап өтіледі. Жалпы өңірде 23 сумен жабдықтау жобасы іске асырылуда, оның 13-і әзірге пайдалануға берілді.
Осыған ұқсас жұмыс бүкіл ел бойынша жүргізілуде. Ағымдағы жылы республикалық бюджеттен сумен жабдықтау саласындағы 257 жобаны іске асыруға 105,7 млрд теңге бөлінді. Сонымен қатар, Арнайы мемлекеттік қор қаражаты есебінен 229 нысанды салуға және жаңғыртуға тағы 135,8 млрд теңге жұмсалды.
Еске салайық, мамыр айында үкімет шешім қабылдап, Жамбыл облысының Қордай және Талас аудандарында екі дәрігерлік амбулаторияның құрылысын аяқтау үшін Арнайы мемлекеттік қордан 319,5 млн теңге бөлген болатын.