Батыс Қазақстан облысының мамандандырылған табиғат қорғау прокуратурасы «Қарашағанақ Петролеум Оперейтинг Б. В.» компаниясын өңірдің қоршаған ортасын ластағаны үшін айыппұл салды.
Forbes.kz мәліметінше, тексеру мұнай-газ өндіруші консорциумның ауаны ластап, қалдықтарды қоршаған ортаға тастағанын анықтады. Ластаушы заттардың көлемі 264 тоннаны құрады.
Прокурорлар компанияны ҚР ӘҚБтК-нің 328-бабы бойынша («Қоршаған ортаға рұқсат етілген антропогендік әсер ету нормативтерін бұзу») әкімшілік жауапкершілікке тарту туралы қаулы шығарды.
«Жалпы сомасы 739 568 808 теңге көлеміндегі айыппұлдар толығымен өндірілді», — деп атап өтті ведомство өкілдері.
______________
Анықтама үшін: «Қарашағанақ Петролеум Оперейтинг Б. В.» - Қазақстанның мұнай саласын дамыту бойынша Қарашағанақ жобасын іске асыру үшін біріккен компаниялар консорциумы.
Консорциумдағы үлестер келесідей бөлінген:
- «Royal Dutch Shell plc» (Нидерланд, Ұлыбритания) — 29,25%;
- «Eni» (Италия) — 29,25%;
- «Шеврон» (АҚШ) — 18%;
- «Лукойл» (Ресей) — 13,5%;
- «ҚазМұнайГаз» (Қазақстан) — 10%.