ОПЕК+ мүшелері Сауд Арабиясының басшылығымен мұнай өндіруді ерікті түрде қысқартуды тәулігіне 2,2 млн баррельге (б/т) 2024 жылдың екінші тоқсанының соңына дейін ұзартты. Келісімдерді орындауға Қазақстанды қоса алғанда, сегіз мұнай экспорттаушы ел қосылады.
Reuters агенттігі хабарлағандай, одақ елдері мұнай өндіруді ерікті түрде төмендетуді жалғастыруға келісті, осылайша ОПЕК+ тобынан тыс жерлерде, атап айтқанда АҚШ, Бразилия және Гайанада мұнай өндірудің өсуі жағдайында нарыққа қосымша қолдау көрсетті.
Анықтама үшін: Мұнай экспорттаушы елдер ұйымы (ОПЕК) – мұнай экспорттаушы елдер мұнай өндіру квоталарын бақылау мақсатында құрған халықаралық ұйым.
ОПЕК+ ОПЕК-ке кірмейтін, бірақ мұнай өндіру және экспорттау мәселелері бойынша осы ұйыммен ынтымақтасатын елдерді белгілеу үшін қолданылады. ОПЕК+ құрамына Қазақстанды қоса алғанда, 11 ел кіреді.
ҚР Энергетика министрлігі мәлімдегендей, Қазақстан мұнай өндіруді тәулігіне 82 мың баррельге қысқартуды ұзартуды ниет етіп отыр. Бұдан әрі өндіру көлемі нарық конъюнктурасына байланысты өзгермек.
Reuters есептеулері бойынша, 2022 жылдан бері ОПЕК+ уәде еткен қысқартудың жалпы көлемі шамамен 5,86 млн б/т құрайды, бұл күнделікті әлемдік сұраныстың шамамен 5,7%-на сәйкес келеді.
2024 жылы мұнайға сұраныс перспективалары белгісіз болып қалуда. Осы жылдың ақпан айында Халықаралық энергетикалық агенттік (ХЭА) сұраныстың шамамен 1,22 млн б/т баяу өсуін болжады. ХЭА сондай-ақ мұнай жеткізілімі негізінен ОПЕК+ тобынан тыс өндірушілер есебінен 103,8 млн б/т рекордтық деңгейге дейін өседі деп күтеді.