Бұрынғы ауыл шаруашылығы министрі, Қазақстанның Ет одағының төрағасы Асылжан Мамытбеков сиыр етін әкетуге енгізілген шектеулерді сынап, ішкі өндірістің төмендеуі мүмкін екенін көрсеткен жазба жариялады.
Facebook-тегі парақшасында ол еске салғандай, биылғы жылдың қыркүйегінде үкімет 13,5 мың тонна көлемінде экспорттық квота белгілеп, қазан айында ЕАЭО елдеріне жеткізуді қоса алғанда, сиыр етін әкетуге толық тыйым салды.
«Мемлекеттік органдардың түсіндірмелері бойынша, бұл шара азық-түлік қауіпсіздігін қамтамасыз етуге, мал шаруашылығы өнімдерін өңдеуді дамытуға және сиыр етінің бағасын тұрақтандыруға бағытталған», — деп атап өтті Мамытбеков.
Сондай-ақ ол Қазақстанға Ресейден ет жаппай әкелініп, базарларда «тегінге» сатылып жатқанына назар аударды. Ет өңдеушілердің айтуынша, ресейлік контрагенттер де, қазақстандық алушылар да салық төлемейді.
Мамытбековтің деректері бойынша:
- 2019 жылы Қазақстан ірі қара мал етін (ет және тірі малды етке шаққанда) 63 мың тонна экспорттады;
- 2019 жылы ірі қара малдың саны 7,4 млн бас болды;
- 2025 жылға қарай мал басы 8,7 млн басқа өсті.
Дегенмен, бұрынғы министр мал басының мұндай өсуіне қарамастан, 13,5 мың тонна квота нарыққа айтарлықтай әсер еткенін атап көрсетеді.
«Егер экспорттың осындай шағын көлемі соншалықты елеулі әсер етсе, бұл елде сиыр еті өндірісінің көлемі айтарлықтай қысқарғанын білдіруі мүмкін», — деп түйіндеді Мамытбеков.
Айта кетейік, қазақстандықтар әлеуметтік желілерде сиыр еті бағасының өсуі тақырыбын мезгіл-мезгіл көтереді. Биылғы жылдың 8 айында елде ірі қара мал еті қымбаттап, 23%-ға өскені хабарланды. Кейбір қалаларда сиыр етін сатқанда, килограмы 7100 теңге болған.