Өскемен қаласында беларусь компаниясымен серіктестікте құрылған қолданыстағы электронды билеттендіру жүйесі «Oskemencard» «ONAY» жүйесіне ауыстырылмақшы. Бұрынғы ШҚО экс-әкімі Даниал Ахметов кезінде енгізілген алдыңғы жүйе бюджетке бірнеше миллиард теңгеге түскен еді.
Ratel.kz мәліметінше, жүйені ауыстыру туралы ақпарат Өскеменнің жаңа әкімі болып Алмат Ақышов тағайындалғаннан кейін пайда болды. Ол өзінің Instagram-парақшасында жаңа жүйемен танысу үшін Алматыға барғанын айтты.
13 ақпанда өңірлік коммуникациялар қызметіндегі брифингте Өскемен қаласы әкімінің орынбасары Абзал Мәулетханов «Алматы қаласының Көлік холдингі» ЖШС әзірлеген «ONAY» жүйесіне көшу ресми түрде растады.
«Oskemencard» жүйесіне тек қызмет көрсету шамамен бір миллиард теңгені құрағаны атап өтілді. Таяуда жүйенің еншілес компаниясы «Өскемен қаласының жолаушылар тасымалын басқару орталығы» ЖШС сауда-саттықта 25 млн теңгеге сатылды.
«Бүгінгі күні қаланың барлық тасымалдаушы кәсіпорындарымен – қоғамдық көліктің 300-ден астам бірлігіне қызмет көрсететін барлығы 10 компаниямен келісімшарт жасалды. Жүйеге үш трамвай бағытын қоса алғанда, 55 бағыт туралы ақпарат енгізілді. Сондай-ақ көше-жол желісі цифрландырылды, бұл көлік құралдарының жұмыс тиімділігін айтарлықтай арттыруға мүмкіндік береді. Бұрынғы жүйе өзінің мерзімін өткерді, технологиялар үнемі өзгеріп отырады, бір орында тұруға болмайды, алға жылжу керек», - деді Абзал Мәулетханов.
Қала билігінің мәлімдеуінше, жаңа жүйені енгізу шығындарын инвестор өз мойнына алады. Оны іске қосу алдын ала 2025 жылдың наурызына жоспарланған. Әкімдік өкілдерінің айтуынша, бұл тарифтердің көтерілуіне әкеп соқпайды және қала тұрғындарына қолайсыздық туғызбайды.
Жүйені қаржыландыру тасымалдаушылар есебінен жүзеге асырылатыны, олар бюджеттен 5 млрд теңге көлемінде субсидия алатыны атап өтілді.
Әзірлеушілердің айтуынша, ONAY жүйесі Алматы, Қарағанды, Теміртау, Балқаш, Саран және Талдықорған қалаларында сәтті жұмыс істеп тұр. Олардың сөзінше, бұл жүйе көлеңкелі айналымды азайту арқылы кәсіпорындардың табыстылығын арттыра алады және қоғамдық көлік қозғалысының тұрақтылығын 95%-ке дейін жақсартады.
«Соңғы үш жыл ішінде жүйе енгізілген басқа қалаларда жылжымалы құрам 97%-ке жаңартылды. ONAY сонымен қатар жолаушылар ағынына егжей-тегжейлі талдау жүргізіп, қызмет көрсету сапасын жақсарту мүмкіндіктерін анықтай отырып, бағыттардағы бар проблемаларды шешуге көмектеседі», - деді «Алматы қаласының Көлік холдингі» ЖШС бас директоры Дәурен Сәбитов.