Көкшетау әкімдігі жасыл желектерді есепке алудың интерактивті картасын – «Е-дендра» енгізу бойынша 54 млн теңгеге келісімшарт жасасты. Мердігер ретінде бағдарламаға авторлық құқығы бар «ITS-PVL» ЖШС шықты.
Әкімдіктің баспасөз қызметінің хабарлауынша, ағаштарды есепке алу картасын пайдалану құқығы «Көкшетау қаласының ТКШ бөлімі» ММ-не 48 жылға беріледі.
««Е-дендра» бағдарламасы қаланың жасыл қорын тиімді басқаруға арналған бірегей құрал болып табылады. Келісімшарт аясында қала бағдарламаны пайдалануға лицензия сатып алады, ол бірнеше негізгі функционалдық мүмкіндіктерді қамтиды», - деп жазады әкімдіктің баспасөз қызметі.
Қала тұрғындары белгілі бір ағаштардың қай жерде орналасқанын, жаңа көшеттердің қай жерде пайда болғанын бақылап, оларды күту туралы өзара келісе алатыны хабарланады.
«Бұл бағдарлама топырақты, қасындағы ағаштарды, ағаштардың ықтимал ауруларын ескере отырып, отырғызу жұмыстарын нақты жоспарлауға мүмкіндік береді, бұл ағаштардың жерсінуі бойынша жақсы нәтиже береді. Әрбір ағашқа реттік нөмір беріліп, бағдарламаның бірыңғай тізіліміне енгізіледі. Сондай-ақ зерттеу барысында әрбір ағаштың төлқұжаты жасалады, онда: жасы, тұқымы, тіршілік жағдайы, орналасқан жері, реттік нөмірі көрсетіледі», - делінген хабарламада.
«Голос народа» сайтының дерегінше, «Әділдік жолы» РҚБ акмола филиалының сарапшысы Самира Тайтенова «Е-дендраны» енгізу бойынша келісімшарт бір көзден тікелей жасалғанын атап өтті. Оның пікірінше, егер жеткізушілер арасында бәсекелестік болмаса, бюджет қаражатын үнемдеу мүмкін емес.
Сонымен қатар, қоғам белсендісі Көкшетау әкімдігінің сатып алуы Ақмола облысының цифрландыру және мұрағаттар басқармасымен келісілуі керек еді. Бірақ бұл жасалмағанын мәлімдеді.
Сонымен қатар «Әділдік жолы» көкшетау филиалының басшысы Ерлаз Жайықбаев жасыл желектерді бақылау жүйесі Павлодарда 2022 жылы іске қосылғанын айтты. Сол кезде кез келген адам greenpvl.kz сайтында әрбір ағаштың төлқұжатын – нөмірін, жасын және жай-күйін көре алатыны хабарланған еді. Алайда, бүгінде біз байқап отырғанымыздай – сайт жұмыс істемейді.
«Біз Павлодарлық сатып алуды зерттеп, тұйыққа тірелдік, себебі бұл келісімшартты порталдан таба алмадық. Ашық дереккөздерде әзірлеуші ретінде «Техно Style» ЖШС көрсетілген, «Берегиня-Био» ҚҚ экологтары тартылған, ал сатып алу шамамен 41 млн теңгеге «Еңбек» ШЖҚ РМК «Еңбек-Павлодар» филиалы арқылы жасалған сияқты», - деді Ерлаз Жайықбаев.
Көкшетау әкімдігі ұйымдастырған кездесуде қоғам белсенділері «Е-дендра» жобасы 54 млн теңгелік бір реттік акцияға айналуы мүмкін деген қауіп білдірді.
Әкімдік өз кезегінде жұмыс тобын құруға уәде берді. Ол мердігер ұйымның жұмыс сапасын бақылайтын болады. Топ құрамына жер қатынастары және сәулет, ТКШ, орман шаруашылығы бөлімдерінің, сыбайлас жемқорлыққа қарсы қызмет пен прокуратураның өкілдері, сондай-ақ бағдарламаны әзірлеушілер мен қоғам белсенділері кіреді.