Астана халықаралық қаржы орталығының (АХҚО) қаржылық қызметтерді реттеу жөніндегі комитеті (AFSA) Binance Kazakhstan криптобиржасына толық реттеуші лицензия берді.
Kursiv.media мәліметінше, енді компания ел аумағында криптовалюталарды саудалау және айырбастау платформасын басқара алады, брокер-дилер ретінде әрекет ете алады және цифрлық активтерді сақтау бойынша қызметтер көрсете алады.
Binance Орталық Азияда алғаш рет реттеуші лицензиясын алғаны атап өтілді.
«Компания бұл процесс өте күрделі болғанын хабарлады. Ол жан-жақты тексеруді, ішкі және сыртқы аудиттерді, сондай-ақ ISO сертификаттауын (қызметтердің белгілі бір халықаралық стандарттарға сәйкестігін) қамтыды. Реттеуші криптобиржаны АХҚО-ның цифрлық активтер қызметінің ережелеріне, бизнес жүргізу қағидаларына, сондай-ақ ақшаны жылыстатумен күрес және басқа да тиісті нормативтік актілерге сәйкес бағалады», — делінген хабарламада.
Белгілі болғандай, Binance-тің Франция, Италия, Литва, Испания, Польша, Швеция, Үндістан, Австралия, Жапония және басқа да елдерде осындай лицензиялары бар.
2022 жылдың көктемінде Президент Қасым-Жомарт Тоқаев Binance негізін қалаушы Чанпэн Чжаомен кездескені хабарланады. Ол жақында ақша жылыстату және басқа да заңсыз операциялар бойынша айыпталып, түрмеден мерзімінен бұрын босатылған болатын. Мемлекет басшысы мен Чжао Қазақстанда криптоиндустрияның аймақтық хабын құру мәселесін талқылаған.
Сонымен қатар, өткен жылдың соңында Binance Kazakhstan-ның бұрынғы басшысы, қазіргі цифрландыру министрі Жаслан Мәдиев Астананы әлемдегі криптоиндустрияның негізгі орталықтарының біріне айналдыру жоспарлары туралы айтқан болатын.
Еске салайық, наурыз айында Астана қаласының қылмыстық істер жөніндегі соты АХҚО-да лицензиясыз және тіркеусіз заңсыз кәсіпкерлік қызметпен айналысқан елорданың екі тұрғынын соттады. Соттың түсіндіруінше, алаяқтар алдын ала сөз байласып, екі жыл бойы Binance платформасында USDT айырбастаумен заңсыз айналысып, 7 млрд теңгеден астам табыс тапқан.