Алматыда Бұқтарма көшесі мен Құлжа трактісі қиылысындағы көлік айырбасында шұңқырлар пайда болды. Әлеуметтік желілерде қала тұрғындары жақында пайдалануға берілген нысанда жол жабынының ақаулары неге пайда болғанына таңғалып отыр.
Қала әкімдігінің баспасөз қызметі Алматы қалалық мобильділік басқармасына сілтеме жасап хабарлағандай, эстакада бойымен қозғалыс 2021 жылы ашылған, алайда айырбас 2023 жылдың қазанында ғана пайдалануға берілгендіктен, нысан 2026 жылға дейін кепілдікте тұр.
Нәтижесінде, алғашқы тексеруден кейін «Bazis Construction» құрылыс компаниясы учаскені өз есебінен жөндеуге міндеттелді.
«Алдын ала мәліметтер бойынша, асфальтбетон жабынының ақаулары гидрооқшаулағыш материалдың қабыршақтануы салдарынан пайда болған. Себептерді нақты анықтау үшін зақымдалған учаске ашылады. «Bazis construction» ЖШС компаниясына кепілдік міндеттемелер шеңберінде алдағы 10 күн ішінде өз қаражаты есебінен қалпына келтіру жұмыстарын жүргізу тапсырылды», - делінген хабарламада.
Сонымен қатар, басқармада ақаулы учаскеде қозғалыс қауіпсіздігі үшін уақытша жөндеу жүргізілгенін атап өтті.
Еске салайық, бұған дейін «К-Дорстрой» АҚ-нан өндіріп алынған 1,6 млрд теңге болатын. Акционерлік қоғам Алматы облысы Іле ауданындағы «Жетіген» аэродромының ұшу алаңына күрделі жөндеу жүргізуге міндеттенген, бірақ шарт талаптарын орындамаған.