Бас прокуратурада БАҚ-та таратылып жатқан, ҚР ҚК-нің 274-бабы («Көрінеу жалған ақпарат тарату») бойынша тергеліп жатқан қылмыстық істер бойынша тергеу органдарының азаптау қолданғаны туралы ақпаратқа түсініктеме берді.
Ведомствоның баспасөз қызметінің мәліметінше, кейбір адамдар ҚР ҚПК-де көзделген заңды тергеу және іс жүргізу әрекеттерін әдейі азаптауға жатқызады.
«Жауапқа шақыру, жауап алудың өзін өткізу, соттың үй қамағы түріндегі бұлтартпау шарасын таңдауы сияқты тергеу әрекеттері әдейі азаптау ретінде көрсетіледі. Осылайша, жұртшылық адастырылады», — делінген хабарламада.
Бас прокуратурада заңнамада азаптау ұғымы нақты айқындалғанын атап өтті.
«Азаптау деп лауазымды адамның дене күшін не психологиялық қысымды әдейі қолдануы түсініледі. Бұл біздің еліміз ратификациялаған БҰҰ-ның Азаптауға және басқа да қатыгез, адамгершілікке жатпайтын немесе ар-намысты қорлайтын әрекет пен жазалау түрлеріне қарсы конвенциясының нормаларына, сондай-ақ Стамбул хаттамасына толық сәйкес келеді», — деп мәлімдеді ведомство.
Прокуратура бүгінгі таңда аталған қылмыстық істерге қатысушыларға қатысты тергеу органдары тарапынан қандай да бір заңсыз әрекеттер немесе азаптау фактілері тіркелмегенін хабарлады.
«Аталған тұлғалар өздеріне тиімді қоғамдық пікір қалыптастыру, құқық қорғау органдарын әшкерелеу және қылмыстық істерді тергеудің толықтығын, жан-жақтылығы мен объективтілігін қамтамасыз етуге кедергі келтіру мақсатында жалған ақпарат таратады», — делінген хабарламада.
Осыған байланысты Бас прокуратура көрінеу жалған ақпарат таратқаны үшін, сондай-ақ сотқа дейінгі тергеуді жүзеге асыратын адамның қызметіне кез келген нысанда араласқаны үшін қылмыстық жауапкершілік туралы ескертті.
Еске сала кетейік, ORDA бас редакторы Гүлнар Бажкеноваға қатысты қылмыстық істер қозғалды. БАҚ кеңсесінде тінту жүргізіліп, оның өзі сот шешімімен үй қамағына алынды.
Кеше Бажкенованың адвокаты — Мұрат Адам болып жатқан оқиғаны азаптау қолдану деп сипаттаған өтініш жасады. Адвокаттың мәлімдемесі кеңінен қоғамдық резонанс тудырып, әлеуметтік желілерде талқылануда.