Әлеуметтік желілерде Өскемен прокуроры Темірлан Шақпантаевтың өз бағыныштылары Ярков пен Меренбаевты ұрып-соқты деген күдікке ілінгені туралы ақпарат тарады.
«HALYQSTAN» Telegram-арнасының мәліметінше, оқиға 31 тамыздан 1 қыркүйекке қараған түні болған. Прокурордың мас күйінде болып, әріптестерін кабинетке шақырып алып, оларды ұрып-соққаны хабарланады. Сонымен қатар, ол түнгі сағат екіде ешбір негізсіз қызметкерлерді дабылға көтерген деп мәлімденеді.
Хабарланғандай, жәбірленушілер арыз жазған, содан кейін Шақпантаевқа қатысты ҚК-нің 109-бабы («Денсаулыққа қасақана жеңіл зиян келтіру») бойынша қылмыстық іс қозғалған.
Шығыс Қазақстан облысы прокуратурасы қала прокурорына қатысты қызметтік тергеу жүргізіліп жатқанын растады.
«Қазақстан Республикасының «Құқық қорғау қызметі туралы» Заңына сәйкес оның жауапкершілігі туралы шешім қабылданғанға дейін ол қызметінен уақытша шеттетілді. Өскемен прокуратурасының басқа қызметкерлеріне қатысты мәліметтерге келсек, бұрын да осы жағдайлар бойынша қызметтік тергеулер жүргізілген. Фактілер ішінара расталып, аталған қызметкерлер қызметтік әдеп нормаларын бұзғаны үшін тәртіптік жауапкершілікке тартылды», - деп хабарлады ведомство.
Белгілі болғандай, бұған дейін қалалық прокуратура жұмысына қатысты басқа да жанжалды эпизодтар айтылған. Мәселен, прокурор Упоровтың мас күйінде көлік руліне отырғаны және жазадан құтылып кеткені, ал жоғарыда аталған прокурор Ярковтың тегі БАҚ материалдарында моншаға баруына байланысты кездескен.
Еске салайық, бұған дейін Ақтау прокурорының Алматы әуежайында «мас бүлік» жасағаны үшін ұсталғаны хабарланған. Оқиға оның демалысы кезінде тамыз айының соңында болған.
10 қыркүйекте іс әкімшілік құқық бұзушылық құрамының болмауына байланысты тоқтатылды. Алайда 11 қыркүйекте Бас көлік прокуратурасы Әбдіровке қатысты істі тоқтату туралы сот қаулысының заңдылығын тексеру жүргізілетінін мәлімдеді.
Кейінірек апелляциялық саты соттың тұжырымдарын негізсіз деп таныды. Сот прокурордың ұсақ бұзақылық жасаудағы кінәсін дәлелдеп, оған 78 640 теңге көлемінде айыппұл салу түріндегі жаза тағайындады. Ерболат Әбдіровтің барлық тексерулер аяқталғанша қызметінен уақытша шеттетілгені атап өтілді.