Бас прокурор Берік Асылов мемлекет басшысы Қасым-Жомарт Тоқаевқа жұмыс қорытындылары туралы есеп берді.
Бас прокуратура баспасөз қызметінің мәліметінше, прокурорлар сотқа дейінгі тергеп-тексеру сатысында қылмыстық-процестік кодекске қайшы келетін 32 мыңнан астам шешімнің жолын кесті, 4 мың адамның қылмыстық істерге негізсіз тартылуына жол бермеді, сондай-ақ 1500-ден астам заңсыз ұсталған азаматты босатты.
«Бас прокурордың наразылықтары бойынша Жоғарғы сот 150 адамның жағдайын жақсартты, оның ішінде 10 адам толық ақталды», - делінген хабарламада.
Сонымен қатар Асылов әлеуметтік-экономикалық салада прокурорлар 81 мың кәсіпкердің, 979 мың зейнеткердің, халықтың әлеуметтік осал топтарындағы және басқа да санаттағы азаматтардың құқықтарын қалпына келтіргенін хабарлады.
«123 мың жұмысшының еңбек құқықтарының бұзылуына жол берілмеді. Балалардың пайдасына 4,6 млрд теңге көлемінде алимент бойынша берешек өндірілді», - деді Бас прокурор.
Сонымен қатар, өткен жылы прокуратура органдарының жұмысы нәтижесінде мемлекетке 627 млрд теңгеден астам сомадағы залал өтелгені белгілі болды.
Сонымен қатар, Берік Асылов экономикаға қосқан үлесі 12 трлн теңгеден асқан 800 инвестордың прокурорлық көмек алғанын айтты.
«Жіберілген бұзушылықтар үшін 136 лауазымды тұлға жауапкершілікке тартылды. Прокурорлар инвесторларға қатысты мемлекеттік органдардың 712 шешімін келісуден бас тартты. Инвестициялық жобаларды сүйемелдеу кезінде «прокурорлық фильтрдің» тиімді пайдаланылғаны атап өтілді. Жалпыұлттық пул жобаларының іске асыру барысын бақылауға мүмкіндік беретін Цифрлық инвестициялық платформа белсенді жұмыс істейді», - делінген хабарламада.
Бұдан басқа, Бас прокурор бірқатар резонанстық қылмыстық істердің тергелу барысы туралы есеп берді, сондай-ақ іздеуде жүрген адамдарды ұстау үшін «ақылды» бейнекамераларды қолдануды қоса алғанда, қылмысқа қарсы күресте цифрлық технологияларды енгізу туралы баяндады.
Өз кезегінде Қасым-Жомарт Тоқаев барлық салада заңдылықты қамтамасыз ету жұмысын жалғастыруды тапсырды. Сондай-ақ ол алаяқтық пен нашақорлық бизнесіне қарсы күресте, сондай-ақ қоғамдық орындарда құқық бұзушылықтың алдын алуда мемлекеттік органдардың қызметін үйлестірудің маңыздылығын атап өтті.