Балқашта «Теміржол жөндеу» ЖШС жүргізіп жатқан жол өткелінің құрылысы кезінде теміржол жолына бетон арқалық құлады. Жұмысшылар зардап шекті - олардың біреуі реанимацияда жатыр.
Informburo.kz деректеріне сәйкес, компанияның баспасөз қызметі оқиға құрылыс-монтаж жұмыстары кезінде болғанын хабарлады.
«Арқалықтың сынып, кейін теміржол жолына құлауы орын алды. Адам шығыны жоқ. Жарақат алған жұмысшылар Балқаш станциясының ауруханасына жатқызылды», – делінген хабарламада.
Қарағанды облысы денсаулық сақтау басқармасы зардап шеккендердің біреуі реанимация бөлімінде екенін және қажетті медициналық көмек алып жатқанын хабарлады. Тағы үш жұмысшы ауруханаға жатқызудан бас тартты, олар тұрғылықты жері бойынша амбулаториялық емдеуге ауыстырылды.
Өңір полиция департаменті еңбекті қорғау ережелерін бұзу фактісі бойынша қылмыстық іс қозғалғанын мәлімдеді.
«Оқиға орнында қажетті тергеу әрекеттері жүргізілуде, болған оқиғаның себептері мен мән-жайлары анықталуда. Өзге ақпарат жария етілмейді», — деп атап өтті ведомствода.
Белгілі болғандай, «Теміржол жөндеу» ЖШС – теміржол және автомобиль жолдарын, сондай-ақ ілеспе инфрақұрылым объектілерін салу және күрделі жөндеу жөніндегі мамандандырылған кәсіпорын. Айта кетейік, компания «Қамқор Менеджмент» холдингінің құрамына кіреді, ондағы үлестерге «Кипрос» ЖШС арқылы кәсіпкер Тимур Құлыбаев иелік етеді.