Қаржы департаментінің директоры мен бас маманы «ҰК "Продкорпорация"» АҚ Астанада сотталды.
Антикор баспасөз қызметінің мәліметінше, Астана қалалық қылмыстық істер жөніндегі ауданаралық соты «ҰК "Продкорпорация"» АҚ қаржы департаментінің директоры Жұмаділов Н.Г. және бас маманы Әбенов Г.Ж. қатысты үкім шығарды.
Олар кәсіпкерден құжаттар жинау бойынша көрсеткен қызметтері, сондай-ақ тауарлық кредит (астық) беру туралы шартқа қол қоюға жәрдемдескені үшін пара алды деген күдікке ілінді.
Нәтижесінде сот айыпталушыларға жалпы сомасы 48 млн теңге айыппұл түріндегі жаза тағайындады, олар квазимемлекеттік сектор субъектілеріндегі мемлекеттік қызметте лауазымдарды атқару құқығынан өмір бойына айырылды.
Өз кезегінде қала прокуратурасы үкімге жаза шарасын бас бостандығынан айыруға өзгерту туралы апелляциялық өтінішхат енгізді.
«ҚР ҚК-нің 41-бабына сәйкес, айыппұл белгіленген мерзімде төленбеген жағдайда жаза шарасы бас бостандығынан айырумен ауыстырылады. Үкім заңды күшіне енген жоқ», - делінген хабарламада.