Астана жер ресурстарын басқару департаменті ЖШС-ге қатысты жер телімін ұзақ уақыт пайдаланбау фактісі бойынша жоспардан тыс тексеру жүргізді.
Ауыл шаруашылығы министрлігі баспасөз қызметінің мәліметінше, ауыл шаруашылығын жүргізуге арналған учаскенің ауданы 6,4862 га құрайды.
«Тексеру нәтижесінде ҚР Жер кодексінің 92-бабының бұзылу фактісі расталды. Астана қалалық сотының азаматтық істер жөніндегі сот алқасының қаулысымен департаменттің талап-арызы қанағаттандырылып, сот шешімі заңды күшіне енді», - делінген хабарламада.
Еске сала кетейік, қыркүйек айының басында үкімет отырысында премьер-министрдің орынбасары Серік Жұманғарин мәлімдегендей, биыл жоспарланған 2 млн га жердің 1,3 млн га пайдаланылмайтын немесе бұзушылықпен берілген ауыл шаруашылығы жерлері мемлекетке қайтарылды.
Тамыз айында Ақтөбе облысында мемлекет меншігіне қайтарылған ауыл шаруашылығы мақсатындағы жер телімдерінің ауданы 30 мың га болғаны хабарланды.
Маусым айында белгілі болғандай, биыл Алматы облысының прокурорлары мемлекет меншігіне ауданы 12,5 мың га және құны 2,5 млрд теңге болатын пайдаланылмайтын жерлердің 155 учаскесін қайтарды.